म. टा. प्रतिनिधी, औरंगाबाद
येत्या दोन सप्टेंबरपासून औरंगाबाद-अहमदाबाद विमान सेवा सुरू होणार आहे. ही सेवा सुरू करण्याबद्दल 'ट्रु जेट' या विमान कंपनीने अधिकृत घोषणा केली असून तिकीट बुकिंग सुरू करण्यात आली आहे.
औरंगाबाद विमानतळावरून विमान सेवा सुरू होण्यासाठी काही महिन्यांपासून प्रयत्न सुरू आहेत. त्याला 'ट्रु जेट' कडून पहिला प्रतिसाद मिळाला आहे. 'ट्रु जेट'तर्फे अहमदाबाद-औरंगाबाद-अहमदाबाद विमान सुरू होत असल्याची घोषणा गुरुवारी करण्यात आली. हे विमान दोन सप्टेंबर रोजी दुपारी ४.१० वाजता अहमदाबादहून औरंगाबादकडे निघणार आहे. ते औरंगाबादला सायंकाळी ५.३५ वाजता पोहचणार आहे. हे विमान औरंगाबादहून सायंकाळी सहा वाजता उड्डाण करून अहमदाबाद येथे रात्री ७.२५ वाजता पोहचणार आहे. या सेवेत इंदूरचा समावेश करण्यात येणार असल्याचे कंपनीकडून सांगण्यात आले. सध्या हे विमान आठवड्यातून चार दिवस उड्डाण करणार असून प्रतिसाद वाढल्यास फेऱ्या वाढविण्यात येणार असल्याचे संकेत आहेत.
…………
\B'स्पाईस जेट'चे दिल्ली विमान लवकरच \B
'इंडिगो' पाठोपाठ 'स्पाईस जेट'नेही दिल्ली-औरंगाबाद विमान सेवेच्या हालचाली सुरू केल्या आहेत. हे विमान ऑक्टोबरच्या पहिल्या आठवड्यात सुरू होण्याची शक्यता आहे.
………
\Bपर्यटन उद्योगाला होणार लाभ \B
औरंगाबादेतून सध्या 'एअर इंडिया'ची मुंबई-औरंगाबाद-दिल्ली, ट्रु जेटची हैदराबादसाठी विमान सेवा आहे. 'एअर इंडिया'ने मुंबई-औरंगाबाद-उदयपूर व 'इंडिगो'ने दिल्ली विमान सेवेची घोषणा केली आहे. आता ट्रु जेटने अहमदाबाद, स्पाईस जेटने दिल्ली विमानसेवा सुरू करण्याचा निर्णय घेतला आहे. त्यामुळे काही महिन्यांत पर्यटन उद्योग वाढण्यास मदत मिळणार आहे.