औरंगाबाद : गुप्तांगावर अन् सबंध शरीरावर चटके, मारहाणीचे वळ असा अमानुष छळ सहन करणाऱ्या अडीच वर्षांच्या हतबल चिमुकलीची हडको एन ९ येथील एका कुंटणखान्यातून सुटका करण्याची धाडसी कामगिरी सोमवारी दामिनी पथकाने फत्ते केली. या ठिकाणावरून पाच नरमाधमांसह दोन महिलांना बेड्या ठोकल्या.
अंगावर शहारे आणणाऱ्या या घटनेची हकीकत अशी, दामिनी पथक प्रमुख पीएसआय अरुणा घुले यांना सकाळी एका जागरुक नागरिकाने फोन केला. एन ९ परिसरातील रेणुका माता मंदिरामागच्या घरात एका महिलेकडे अडीच वर्षांची मुलगी आहे. ती मुलगी या महिलेची नसून तिचा अमानुष छळ सुरू आहे, अशी माहिती मिळाली. या माहितीवरून पीएसआय घुले, स्वाती बनसोडे, पूनम झाल्टे व कोमल निकाळजे यांनी पीसीआर मोबाइलसोबत या महिलेच्या घरी छापा टाकला. या घरात तीन महिला व पाच पुरूष आढळले. ही चिमुकली देखील तेथे होती. या महिला कुंटणखाना चालवत असल्याचे दिसून आले. प्रमुख आरोपी गीता कृष्णा कदम हिच्यासह दोन महिला व पाच पुरुषांना ताब्यात घेण्यात आले. पोलिस आयुक्त अमितेशकुमार यांना ही माहिती देण्यात आली. त्यांच्या आदेशानुसार सिडको पोलिस ठाण्यात बाल लैंगिक अत्याचार कायद्यानुसार रात्री उशिरापर्यंत गुन्हा दाखल करण्याची प्रक्रिया सुरू होती.
खरेदी विक्रीची शंका
या मुलीला तिची आई सोडून गेली आहे अथवा हा खरेदी विक्रीचा प्रकार आहे का, याची पोलिस चौकशी करीत आहेत. पोलिसांना मिळालेल्या प्राथमिक माहितीमध्ये या चिमुकलीच्या मोठ्या बहिणीची विक्री करण्यात आल्याचे स्पष्ट झाले आहे. या माहितीची पडताळणी करण्यात येत आहे. या चिमुकलीबाबत गीताला विचारणा करण्यात आली असता, तिने या मुलीच्या आईला दुसऱ्या विवाह करायचा होता. त्यामुळे तिनेच तिला येथे आणून सोडल्याची माहिती दिली. या मुलीच्या आईचा मोबाइल क्रमांक घेऊन पोलिसांनी तिच्याशी संपर्क साधला. यावेळी तिने अहमदनगर येथील गावी असल्याचे सांगितले. तिच्या आईला पोलिसांनी चौकशीसाठी बोलावले आहे.
वेश्या व्यवसायासाठी केले प्रवृत्त
पोलिसांनी ताब्यात घेतलेल्या इतर दोन महिलांमध्ये एक एकोणीस वर्षांची तरुणी आहे. या तरुणीने दामिनी पथकाला माहिती देताना मला देह विक्रीसाठी बळजबरीने प्रवृत्त केल्याचे सांगितले. गीता कदम हिच्या घरी पोलिसांना अनेक मोबाइल, दारू बियरच्या रिकाम्या बाटल्यांचा साठा आदी साहित्य आढळून आले.