abdulwajed.shaikh@timesgroup.com
औरंगाबादः रेल्वेने प्रवास करणारे चाकरमानी, अधिकारी, शहरवासीयांसाठी मन प्रफुल्लित करणारी बातमी. तुम्ही स्टेशनच्या जीर्ण झालेल्या, डागाळलेल्या, सतत माशा घोंघावणाऱ्या इमारत क्रमांक दोनवरील चित्र पाहून कंटाळलात ना? लवकरच ही टोलेजंग इमारत चकचकीत होणार असून त्यासाठी साडेचौदा कोटींचा प्रस्ताव दिल्ली दरबारी पाठवण्यात आला आहे.
केंद्र सरकारने अर्थसंकल्पात जाहीर केलेल्या घोषणेनुसार मॉडेल रेल्वे स्टेशनच्या यादीत असलेल्या स्टेशनवरील क्रमांक एकच्या इमारतीचे काम पूर्णत्वास गेले आहे. इमारत क्रमांक दोनचे काम मात्र थंड बस्त्यात पडले होते. पर्यटन विभागाने या इमारतीच्या बांधकामासाठी पाच कोटी रुपये देण्याचे जाहीर केले. याशिवाय २०१६च्या अर्थसंकल्पात दीड कोटींची तरतूद इमारतीसाठी करण्यात आली. मात्र, घोषणा होऊनही निधी न मिळाल्यामुळे रेल्वे विभागाकडून या कामासाठी पुन्हा प्रस्ताव तयार करण्यात आला. औरंगाबाद आणि नांदेड रेल्वे स्टेशनच्या इमारतीचा प्रस्ताव दिल्ली रेल्वे बोर्डाकडे पाठविण्यात आला आहे. या प्रस्तावाला मंजुरी मिळताच येथील कामाला सुरुवात होणार आहे, अशी माहिती विभागीय रेल्वे व्यवस्थापक डॉ. ए. के. सिन्हा यांनी ‘मटा’शी बोलताना दिली.
औरंगाबाद रेल्वे स्टेशनच्या दोन नंबरच्या इमारतीच्या नूतनीकरणासाठी साडेचौदा कोटींचा प्रस्ताव दिल्लीला पाठवला आहे. प्रस्तावाला मंजुरी मिळाल्यानंतर निविदा प्रक्रिया पूर्ण करून कामाला सुरुवात केली जाईल. - अखिलेश सिन्हा, व्यवस्थापक, नांदेड रेल्वे विभाग
...अशा राहतील सुविधा
- एसी, नॉन एसी विश्रामगृह
- उपहार गृह, परिसरात कारंजे
- पर्यटन माहिती सुविधा
- तिकीट बुकिंग काउंटर
- एटीएम, बस टाइप शेल्टर
- सामान ठेवण्याची संगणीकृत खोली
- सरकते जिने, लिफ्टची सुविधा
‘अ’ वर्गात समावेश
- १८००० प्रवाशांचा राबता
- २२ एक्स्प्रेस गाड्या
- १२ पॅसेंजर गाड्या
- ५ कोटी पर्यटन विभागाकडून
- १.५ कोटी अर्थसंकल्पात मंजूर
- १४ कोटी ५० लाखांची मागणी