म. टा. प्रतिनिधी, औरंगाबाद
स्टेट बँक ऑफ इंडियामध्ये सहयोगी बँकांच्या विलिनीकरणाला केंद्र सरकारने दिलेल्या परवानगीचा निषेध करत शुक्रवारी, १७ फेब्रुवारी रोजी जिल्हा बँक कर्मचारी संघटनेने एसबीआयच्या सिडको येथील विभागीय कार्यालयासमोर जोरदार निदर्शने केली.
संघटनेने जारी केलेल्या पत्रकात म्हटले आहे की, ‘सहयोगी बँकांच्या विलिनीकरणानंतर मोठ्या प्रमाणात बँकेच्या शाखा बंद होतील. त्यामुळे नव्याने परवाना मिळालेल्या बँकांचे फावेल. तसेच खासगी सावकारांचे फावेल. नोटबंदीनंतर झालेला गोंधळ आता कमी होऊ लागला आहे. मात्र, यामुळे आणखी गोंधळाची स्थिती निर्माण होईल.’ आंदोलनात शंभरहून अधिक कर्मचाऱ्यांनी सहभाग घेतला. यावेळी ऑल इंडिया बँक एम्प्लॉइ असोसिएशनचे राष्ट्रीय सचिव देविदास तुळजापूरकर, एसबीएच संघटनेचे सचिव जगदीश भावठाणकर यांनी मार्गदर्शन केले. राकेश बुरबुरे, रवींद्र धामणगावकर, हेमंत जामखेडकर, सुनीता गणोरकर यांची विशेष उपस्थिती होती.