म. टा. प्रतिनिधी, औरंगाबाद
दिल्ली मुंबई इंडस्ट्रिअल कॉरिडॉर (डीएमआयसी) च्या औरंगाबाद इंडस्ट्रिअल सिटी (ऑरिक) च्या सौंदर्यीकरणाच्या आराखड्यासाठी मुंबईच्या टेराकॉन इन्फोटेक कन्सलटन्सीला कंत्राट मिळाले आहे. एका ऑस्ट्रेलियन कंपनीच्या सहकार्याने हा आराखडा तयार करण्यात येणार आहे.
ऑरिकमधील सौंदर्यीकरणासाठी आराखड्यात स्वतंत्र तरतूद करण्यात आली होती. पायाभूत सुविधा आणि मध्यवर्ती सुविधा हॉलचे काम सुरू झाल्यानंतर तिसऱ्या टप्प्यात सौंदर्यीकरणासाठी २ कोटी २० लाखांचे कंत्राट देण्यात येणार आहे. यातून सरोवर, उद्याने, संगीत कारंजे, हिरवळ आदीचा आराखडा तयार करण्यात येईल. मे महिन्यात याची निविदा निघण्याची शक्यता आहे. त्यापूर्वी टेराकॉनतर्फे आराखडा सादर केला जाईल. टेराकॉनने एका ऑस्ट्रेलियन कंपनीच्या सहकार्याने आराखडा तयार करण्यात येणार आहे. ऑस्ट्रेलियन कंपनीच्या तज्ज्ञांनी दोन दिवसांपूर्वी औरंगाबाद दौरा केला आणि साइटची पाहणी केली. आराखडा सादरीकरणानंतर पुढची प्रक्रिया पार पडेल, असे सूत्रांना सांगितले.