आईचा खून, मुलास जन्मठेप

म. टा. प्रतिनिधी, औरंगाबाद
घरातील गहू दुकानात विकल्याने आई मुलाला रागावली आणि त्याचा राग डोक्यात घालून कोयत्याने सपासप वार करीत आईचा खून करणाऱ्या मुलाला जन्मठेप व पाच हजार रुपये दंडाची शिक्षा जिल्हा व सत्र न्यायाधीश एस. जी. शेटे यांनी गुरुवारी ठोठावली. आरोपीच्या पत्नीनेच आपल्या पतीविरुद्ध तक्रार दिली आणि शेवटपर्यंत आपल्या तक्रारीवर ठाम राहिली, हे विशेष.
याप्रकरणी आरोपीची पत्नी नानूबाई दादाराव साबळे (वय ४३, रा. गेवराई पायगा, ता. फुलंब्री, जि. औरंगाबाद) यांनी फिर्याद दिली होती. फिर्यादीनुसार, २२ जून २०१० रोजी दुपारी बाराच्या सुमारास, घरातला गहू दुकानात विकल्याने मृत बाळूबाई फकिरबा साबळे (वय ७०) या आपला मुलगा व आरोपी दादाराव फकिरबा साबळे (वय ४८, रा. गेवराई पायगा, ता. फुलंब्री) याला रागावल्या. आई रागावल्यामुळे संतप्त झालेल्या आरोपी दादाराव याने शेजारी पडलेल्या कोयत्याने आपल्या आईच्या मानेवर, डोक्यावर तसेच कानावर गंभीर वार केले. यात त्या कोसळल्या व हॉस्पिटलमध्ये नेत असतानाच त्यांचा मृत्यू झाला. याप्रकरणी आरोपीची पत्नी नानूबाई यांनी दिलेल्या तक्रारीवरुन आरोपीविरुद्ध वडोदबाजार पोलिस ठाण्यात खुनाचा गुन्हा दाखल झाला व त्याला २४ जून २०१० रोजी अटक करण्यात आली. तेव्हापासून आरोपी अटकेतच होता. या प्रकरणी तपास अंमलदार पल्लवी बरगे यांनी सखोल तपास करून कोर्टात दोषारोपपत्र दाखल केले. खटल्यावेळी सहायक सरकारी वकील अनिल हिवराळे यांनी १२ साक्षीदारांचे जबाब नोंदविले.

पत्नीचा साक्ष महत्त्वाची
या खटल्यात आरोपीची पत्नी व फिर्यादी तसेच वैद्यकीय अधिकाऱ्याची साक्ष महत्त्वाची ठरली. दोन्ही बाजुंच्या युक्तिवादानंतर व साक्ष-पुराव्यांवरून कोर्टाने आरोपीला जन्मठेप व पाच हजार रुपये दंड व दंड न भरल्यास सहा महिने कालावधीचा साधा कारावास ठोठावला.