खंडोबा मंदिराचे काम खोळंबले

म. टा. प्रतिनिधी, सातारा
साताऱ्यातील पुरातन अशा हेमाडपंती मंदिराची दुरावस्था झाली असून, लोकप्रतिनिधी, नागरिकांनी पाठपुरावा केल्यानंतर जानेवारी २०१६ मध्ये मंदिराच्या दुरुस्तीसाठी, सभामंडप व दीपमाळेच्या कामासाठी १ कोटी १३ लाख रुपये मंजूर झाले. पण, दीड वर्ष उलटल्यानंतरही प्रत्यक्ष कामाला सुरूवात झालेली नाही. त्याबद्दल आमदार संजय शिरसाट यांनी गुरुवारी पत्र देऊन पुरातत्व खात्याकडे विचारणा केली आहे.
३०० वर्षे जुन्या असलेल्या साताऱ्यातील खंडोबा मंदिराच्या कामासाठी पुरातत्व खात्याला कंत्राटदार मिळत नसून, निधी मंजूर झाल्यापासून तीन वेळेस निविदा काढण्याचेच काम करण्यात आले आहे. उन्हाळा संपायला अवघा एक महिना शिल्लक असून पावसाळ्यात काम करता येत नाही. पावसाळा संपत नाही तोच यात्रा जवळ येते. त्यामुळे यावर्षीही मंदिराच्या कामाला सुरुवात करण्यासंदर्भात पुरातत्व खात्याकडून कोणतीच पावले उचलली जाण्याची शक्यता दिसत नाही. दोन वर्षापूर्वी झालेल्या पावसामुळे दीपमाळेचे दिवे पडले होते. त्यानंतर तेही काम पुरातत्व खात्याने नियमबाह्यपणे सिमेंट चोपडून केले. त्यांच्या दुर्लक्षामुळे गावकरी, विश्वस्तांमध्ये संतप्त भावना आहे.

‘काम सुरू करा’
आमदार संजय शिरसाट यांनी यासंदर्भात पुरातत्व खात्याला पत्र लिहून निधी मंजूर असताना आतापर्यंत काम का झाले नाही त्याची संपूर्ण माहिती मागितली आहे. तसेच लवकरात लवकर काम सुरू करण्याची मागणीही केली आहे.