म. टा. प्रतिनिधी, औरंगाबाद
सुपारी किलर इम्रान मेहंदी पलायन कटातील आणखी एक पसार आरोपीला गुन्हे शाखेने गुरुवारी जिन्सी भागात अटक केली. शेख सद्दाम शेख ईमाम (वय २८ रा. युनूस कॉलनी, कटकटगेट) असे त्याचे नाव आहे.
इम्रान मेहंदीला २७ ऑगस्ट रोजी पळवून नेण्यासाठी आलेल्या मध्यप्रदेशच्या टोळीला गुन्हे शाखेने अटक केली होती. याप्रकरणी सिडको एमआयडीसी पोलिस ठाण्यात गुन्हा दाखल करण्यात आला आहे. तपासामध्ये या गुन्ह्यात मेहंदीचा साथीदार शेख सद्दाम याचाही हात असल्याची माहिती समोर आली होती. मात्र, गुन्हा घडल्यापासून तो सापडत नव्हता. तो जिन्सी भागात गुरुवारी आला असल्याची माहिती गुन्हे शाखेला मिळाली होती. यावरून सापळा रचून सद्दामला अटक करण्यात आली. सद्दाम या कटामध्ये मध्यप्रदेशातील आरोपींच्या संपर्कात होता. ही कारवाई पोलिस आयुक्त चिरंजीवप्रसाद, उपायुक्त डॉ. दीपाली धाटे घाडगे, सहाय्यक पोलिस आयुक्त नागनाथ कोडे यांच्या मार्गदर्शनाखाली पोलिस निरीक्षक मधुकर सावंत, सहाय्यक पोलिस निरीक्षक अजबसिंग जारवाल, जमादार शिवाजी झिने, राजेंद्र साळुंके, सुनील धात्रक, गजानन मांटे, प्रभाकर राऊत व विशाल सोनवणे यांनी केली.
…
\Bगुन्हेगारी पार्श्वभूमी\B
आरोपी सद्दाम याच्यावर पूर्वीचे गुन्हे दाखल आहेत. जानेवारी २०१८ मध्ये मेहंदी व कुरेशी समर्थकात कोर्टात दंगल झाली होती. यामध्ये वेदांतनगर पोलिस ठाण्यात खुनाचा प्रयत्न केल्याप्रकरणी आरोपींविरुद्ध गुन्हा दाखल करण्यात आला आहे. या गुन्ह्यामध्ये देखील सद्दामचा समावेश होता. तसेच फुलंब्री पोलिस ठाण्यात देखील त्याच्यावर दरोड्याचा गुन्हा दाखल आहे.