शाहरुखच्या ‘फॅन’ला ‘जबरा फॅन’चा धक्का

औरंगाबादः यशराज फिल्म्स्च्या ‘फॅन’ या चित्रपटात ‘जबरा फॅन’ हे गाणे दाखविले नाही म्हणून राज्य ग्राहक मंचाच्या औरंगाबाद खंडपीठात करण्यात आलेल्या अपिलामध्ये निर्माते आदित्य चोप्रा, सेन्सॉर बोर्ड, दिग्दर्शक मनीष शर्मा, अभिनेता शाहरुख खान आणि पीव्हीआर सिनेमा चित्रपटगृहाला नोटीस बजावण्याचे आदेश पीठासीन अधिकारी के. बी. गवळी यांनी दिले आहेत.

शिक्षिका असलेल्या अफरीन फातिमा झैदी यांनी हे अपिल केले आहे. त्यांचा तक्रार अर्ज औरंगाबाद जिल्हा ग्राहक तक्रार निवारण मंचाने २९ एप्रिल रोजी फेटाळला होता. या आदेशाला त्यांनी राज्य ग्राहक मंचाच्या औरंगाबाद खंडपीठात आव्हान दिले आहे. अफरीन यांनी ‘फॅन’ चित्रपटाचा पहिल्याच दिवशी पहिला शो पाहिला. चित्रपटच्या प्रोमो आणि ट्रेलरमध्ये ‘जबरा फॅन’ हे गाणे दाखविले जात होते, मात्र प्रत्यक्षात चित्रपटगृहात दाखविले गेले नाही, असा त्यांचा आक्षेप आहे. ‘जबरा फॅन’ या गाण्याचा आनंद घेण्यासाठीच तक्रारदार अफरीन या आपल्या नबील आणि फ्लोरा या दोन मुलांना घेऊन १५ एप्रिल रोजी चित्रपटगृहात गेल्या. सर्व कुटुंब चित्रपट बघायला नेले होते. तिकिटासाठी त्यांना १०५० रुपये खर्च आला.