यूएईत गुंतवणूक करा ः डिसुझा

औरंगाबाद ः भारतीय कंपन्यांनी यूएईमधील रास-ए-खेमा या राज्यात यावे. तेथे गुंतवणूक करावी आणि तेथील सोय‌ी-सुविधांचा अतिशय चपखलपणे उपयोग करून घ्यावा, असे आवाहन यूएईमधील गव्हर्नमेंट ऑफ रास-अल-खिमह राज्याच्या इंटरनॅशनल बिझनेस डेव्हलपमेंट विभागाचे असोसिएट मॅनेजर अॅलन निक्सॉन डिसुझा यांनी केले.
फेडरेशन ऑफ इंडियन एक्सपर्ट ऑर्गनायजेशन (फिओ); गव्हर्नमेंट ऑफ रास-अल-खिमह आणि चेंबर ऑफ मराठवाडा इंडस्ट्रीज अँड अॅग्र‌िकल्चर (सीएमआयए) यांच्यातर्फे आयोजित ‘भारतीय कंपन्यांसाठी यूएईमध्ये व्यापार आणि गुंतवणुकीसाठी संधी’ या विषयावरील व्याख्यानात डिसुझा बोलत होते. व्यासपीठावर यावेळी एफआयईओचे मॅनेजमेंट कमिटीचे सदस्य नंदकिशोर कागलीवाल, सीएमआयएचे नितीन गुप्ता यांची उपस्थिती होती. यावेळी ‌डिसुझा म्हणाले, ‘रास-अल-खिमाह हे यूएईमधील राज्य असून, तेथे उद्योजकांना टॅक्स नाही. जमीनदेखील उपलब्ध करून दिली जाते. य‌ाशिवाय विविध सोयी-सुविधाही पुरवल्या जातात. त्याचा फायदा भारतीय कंपन्यांनी घेतला पाहिजे. गुंतवणूक करणाऱ्या कंपन्यांना रेडकार्पेट ट्र‌िटमेंट दिली जाते. यामुळे अनेक भारतीय व औरंगाबादच्या उद्योजकांनी या संधीचा लाभ घ्यावा.’ फिओ (एफआयईओ)चे मॅनेजमेंट कमिटी मेंबर कागलीवाल यांनीही त्यांचे मनोगत व्यक्त केले.