म. टा. प्रतिनिधी, औरंगाबाद
जालना रोडवरील शासकीय दूध डेअरीच्या जागेतील दोन एकरवर दिवंगत गोपीनाथ मुंडे यांच्या स्मारकाच्या आरेखनास (डिझाइन) राज्याच्या उपसमितीने मंजुरी दिली. यामुळे दिवंगत गोपीनाथ मुंडे यांचे स्मारक बांधण्याच्या कामास लवकरच सुरुवात होईल, अशी शक्यता वर्तविली जात आहे. बांधकामासाठी ५० कोटी ६१ लाख रुपयांची तरतूद करण्यात आली आहे. बांधकामाची जबाबदारी सिडकोला देण्यात आली आहे.
दिवंगत गोपीनाथ मुंडे यांचे औरंगाबाद येथे भव्य स्मारक असावे, असा प्रस्ताव महापालिकेच्या सर्वसाधारण सभेत मंजूर करण्यात आला होता. या स्मारकासाठी राज्य शासनाच्या नगरविकास विभागाकडून २९ मे रोजी अध्यादेश काढण्यात आला. या अध्यादेशाप्रमाणे गोपीनाथ मुंडे स्मारकाचा आराखडा निश्चित करण्यासाठी तत्कालीन महसूल मंत्र्यांच्या अध्यक्षतेखाली उपसमिती स्थापन करण्यात आली होती. कालांतराने या उपसमितीचे अध्यक्षपद चंद्रकांत पाटील यांच्याकडे देण्यात आले आहे. राज्य शासनाने स्मारकांचे बाधकाम करण्यासाठी ५० कोटी ६१ लाख रुपयांचा निधी जाहीर केला आहे. या निधीतून स्मारक उभारले जाणार आहे. तत्पूर्वी सिडकोकडून स्मारकाचे आरेखन तयार करण्यात आले. या आरेखनाचे सादरीकरण जिल्हाधिकारी उदय चौधरी यांच्या अध्यक्षतेखालील जिल्हा स्मारक समिती समोर करण्यात आले. जिल्हा समितीची मंजुरी मिळाल्यानंतर हा प्रस्ताव मंजुरीसाठी राज्याच्या उपसमितीसमोर ठेवण्यात आला होता. हा प्रस्ताव समिती अध्यक्ष, मंत्री चंद्रकांत पाटील यांच्यासह पंकजा पालवे, विनोद तावडे या समितीसमोर ठेवण्यात आला. या समितीने हा प्रस्ताव मंजूर केला आहे. ही मंजुरी मिळाल्यानंतर स्मारकाच्या बाधकामाची निविदा काढण्यात आली आहे, अशी माहिती सिडकोतील सूत्रांनी दिली.
……
\B२४ महिन्यांत काम \B
दिवंगत गोपीनाथ मुंडे स्मारकाचे काम येत्या २४ महिन्यांत पूर्ण करण्याचे उद्दिष्ट ठरविण्यात आले आहे. सध्या निविदा काढण्यात आली असून स्मारकाच्या कामाचे भूमिपूजन विधानसभा निवडणूक आचारसंहितेपूर्वी करण्यात येणार असल्याची माहिती सिडको विभागाकडून देण्यात आली आहे.
………