म. टा. प्रतिनिधी, औरंगाबाद
उस्मानपुरा परिसरात शुक्रवारी सकाळी फोडण्यात आलेल्या एटीएम फोडण्याच्या प्रकरणात उस्मानपुरा पोलिसांनी एका संशयिताला ताब्यात घेतले आहे. हा आरोपी सराईत गुन्हेगार असून त्याच्यावर यापूर्वी देखील जानेवारी २०१६ मध्ये दशमेशनगर भागातील एटीएम फोडल्याचा गुन्हा दाखल आहे.
शुक्रवारी सकाळी सात ते आठ वाजेच्या दरम्यान सेंट्रल बँक ऑफ इंडीयाचे एटीएम फोडण्याचा प्रयत्न करण्यात आला होता. मात्र, सायरन वाजल्याने चोरट्याने पलायन केले होते. चोरटा एटीएम सेंटरमध्ये असलेल्या सीसीटीव्ही कॅमेऱ्यात चित्रीत झाला आहे. दरम्यान, या प्रकरणी उस्मानपुरा गुन्हे प्रकटीकरण पथकाचे पीएसआय कल्याण शेळके यांनी एका संशयित आरोपीला ताब्यात घेतले आहे. ३१ जानेवारी २०१६ रोजी दशमेशनगर भागात एसबीआय बँकेचे एटीएम मशीन फोडल्याची घटना घडली होती. याप्रकरणी या संशयित आरोपीवर गुन्हा दाखल करण्यात आला होता. शुक्रवारी घडलेल्या घटनेमध्ये या आरोपीचा समावेश आहे का याची चौकशी करण्यासाठी त्याला ताब्यात घेण्यात आले आहे. या आरोपीची गुन्हे प्रकटीकरण पथकाकडून कसून चौकशी सुरू आहे.
…