दूध संघ अध्यक्षपदावरून राजकारण तापलं; अब्दुल्ल सत्तारांबद्दल शिवसेनेत खदखद?

औरंगाबादः जिल्हा दुध संघाच्या अध्यक्षपदावरून जिल्ह्याचं राजकारण तापलं असून, शिवसेना विरोधात शिवसेना अशी परिस्थिती पाहायला मिळत आहे. भाजपचे आमदार हरिभाऊ बागडे हेच औरंगाबाद जिल्हा सहकारी दूध उत्पादक संघाचे अध्यक्ष होणार असल्याची महसूल राज्यमंत्री अब्दुल सत्तार यांची घोषणा केली. त्यानंतर दूध संघाचा अध्यक्ष शिवसेनेचा होऊ शकतो, असे विधान शिवसेना नेते चंद्रकांत खैरे यांनी केले. तर रोहयो मंत्री संदीपान भुमरे यांना सुध्दा सत्तारांची घोषणा रुचली नसल्याची चर्चा आहे.

दूध संघाच्या निवडणुकीत काँग्रेस जिल्हाध्यक्षांनी बागडे यांना पाठिंबा दिल्याचा आरोप काँग्रेसच्या नेत्यांनी पत्रकार परिषद घेऊन केला होता. त्यामुळे काँग्रेस विरोधात काँग्रेस अशी परिस्थिती निर्माण झाली होती. त्यानंतर आता सत्तारांनी बागडे यांच्या नावाची दूध संघाच्या अध्यक्षपदासाठी घोषणा करून टाकली आहे. मात्र सत्तार यांच्या घोषणेमुळे शिवसेनेच्या इतर नेत्यांमध्ये नाराजी पाहायला मिळत आहे. त्यामुळे शिवसेना विरोधात शिवसेना अशी चर्चा जिल्ह्याच्या राजकारणात आहे.

वाचाः वर्ध्यात भाजप आमदाराच्या मुलासह 7 विद्यार्थ्यांचा मृत्यू, पाहा अपघातानंतरचा पहिला VIDEO

भूमरे समर्थकांना हवे अध्यक्षपद....

रोहयो मंत्री संदीपान भुमरे यांचे समर्थक नंदलाल काळे हे दूध संघाचे उपाध्यक्ष आहेत. त्यामुळे यावेळी अध्यक्षपदाची माळ त्यांच्या गळ्यात पडावी अशी इच्छा भूमरेंची असल्याची चर्चा आहे. त्यामुळे यासाठी भुमरे यांनी प्रयत्न केल्यास बागडे यांच्या मार्गात अडचणी येऊ शकतात.

सत्तारांबद्दल शिवसेनेत खदखद...

गेल्या वर्षी झालेल्या जिल्हा सहकारी बँकेच्या अध्यक्षपदाची निवडणूक जाहीर होण्यापूर्वीच त्यावेळी भाजपमध्ये असलेल्या नितीन पाटील यांच्या नावाची अब्दुल सत्तार यांनी घोषणा केली होती. त्यानंतर पाटील यांना शिवसेनेत आणून त्यांना अध्यक्ष करण्याची महत्वाची भूमिका सत्तार यांनी बजावली होती. त्यावेळी सुध्दा अनेक शिवसेना नेत्यांमध्ये सत्तारांबद्दल नाराजी पाहायला मिळाली होती. आता सुद्धा सत्तार यांनी बागडे यांच्या नावाची घोषणा केल्याने पुन्हा एकदा शिवसेना नेत्यांमध्ये सत्तारांबद्दल नाराजी पाहायला मिळत आहे.

वाचाः दारात वरात आली, लग्नाच्या विधी सुरू झाल्या अन् आला एक फोन, क्षणात घडलं भयंकर