‘शिक्षणातील भेद नष्ट करणारा तरुणवर्ग तयार करा’
- न्या. बी.एन. देशमुख यांचे आवाहन
- कुलगुरू बी. ए. चोपडे यांच्या सत्कारप्रसंगी न्या. देशमुख यांचे आवाहन
म. टा. प्रतिनिधी, औरंगाबाद,
एकीकडे एकेका वर्गाला शिकवण्यासाठी अनेक शिक्षक आहेत तर दुसरीकडे एकाच शिक्षकाला अनेक विषय शिकवावे लागत आहेत. शिक्षणातील हा भेद नष्ट करणारा तरुण वर्ग विद्यापीठाने तयार करावा, असे आवाहन न्या. बी. एन. देशमुख यांनी केले.
शुक्रवारी (१ जुलै) कुलगुरू बी. ए. चोपडे षष्ट्यब्दपूर्ती नागरी समितीच्या वतीने न्या. बी. एन. देशमुख यांच्या हस्ते कुलगुरू बी. ए. चोपडे यांचा मानपत्र, स्मृतिचिन्ह देऊन नागरी सत्कार करण्यात आला. यावेळी त्यांच्या पत्नी सौ. नलिनी चोपडे यांचाही सत्कार करण्यात आला. याप्रसंगी देशमुख बोलत होते.
देशमुख म्हणाले की, ‘दिवसेंदिवस शिक्षणाचे स्वरुप हे बदलत आहे. पूर्वी चातुरवर्णामुळे समाजातील काही वर्गांना शिक्षणाचे दरवाजे बंद होते. आजही असे प्रयत्न होत आहेत. गुणवत्तेच्या नावाखाली गळचेपीचे वातावरण निर्माण होत आहे. मराठवाड्याच्या विद्यार्थ्यांमध्ये गुणवत्तेची कमी नाही. विद्यापीठाने ज्ञानदानाचे काम करण्यासोबतच शिक्षणातील तफावत, भेद नष्ट करणारा तरुणवर्ग तयार करावा. ही जबाबदारी विद्यापीठाची आहे.’
कुलगुरूंबद्दल गौरवोद्गार काढत ते म्हणाले, ‘चोपडे हे आपल्या विद्यापीठाला कुलगुरू म्हणून लाभले हे आपले भाग्य आहे. कुलगुरू हा विद्यापीठातील टीमचा कॅप्टन असतो. कॅप्टन हा एकटा खेळी करत नाही तर तो टीमकडूनही खेळी करवून घेतो.’
कार्यक्रमाच्या अध्यक्षस्थानी मौलाना आझाद शिक्षण संस्थेच्या अध्यक्ष फातेमा झकेरिया या होत्या. यावेळी अंकुशराव कदम, रावसाहेब कसबे, गंगाधर गाडे, मुकुंद कुलकर्णी, मुनीष शर्मा, डॉ. वाल्मिक सरवदे, सर्जेराव ठोंबरे, शंकर अंभोरे आदी मान्यवरांची यावेळी उपस्थिती होती.