हनुमान मंदिरात महाआरतीचा हट्ट भाजपला भोवला, शहरातील नेत्यांना पोलिसांनी घेतलं ताब्यात

औरंगाबाद : आज सकाळी औरंगाबाद शहरातील भाजप नेत्यांची पोलिसांनी धरपकड करत ताब्यात घेतल्याचं पाहायला मिळाले. सहा डिसेंबरनिमित्ताने शहरातील सुपारी हनुमान मंदिरात महाआरती करण्यासाठी भाजप नेते जाणार होते. मात्र पोलिसांची परवानगी नसल्याने पोलिसांनी मंदिरात जाण्यापूर्वीचं भाजप शहराध्यक्ष संजय केणेकर यांना पोलिसांनी ताब्यात घेतले.

दरवर्षी सहा डिसेंबर रोजी शिवसेना आणि भाजपकडून भगवा दिवस साजरा करत शहरातील सुपारी हनुमान मंदिरात महाआरती केली जाते. मात्र, महाविकास आघाडीच सरकार आल्यापासून भाजप-शिवसेना वेगवेगळ्या पद्घतीने महाआरती करत होते. पण यावेळी करोनाची परिस्थिती आणि परवानगी नसल्याने शिवसेनेकडून महाआरती न करण्याचा निर्णय घेण्यात आला होता. तर भाजपकडून मात्र महाआरती करणार असल्याचे सांगण्यात आले होते.

राष्ट्रवादी काँग्रेसमध्ये शोककळा, विद्यार्थ्यांसाठी झटणारे बडे नेते डॉ. उल्हास उढाण यांचे निधन
पोलिसांनी परवानगी दिली नसली तरीही भाजपकडून महाआरती करण्याचा इशारा देण्यात आला होता. त्यामुळे मंदिरात जाण्यापूर्वीच पोलिसांनी भाजप नेत्यांना ताब्यात घेऊन पोलीस ठाण्यात नेऊन बसवले होते. तर अनेक नेते आणि कार्यकर्ते सुद्धा पोलीस ठाण्यात हजर होते.