​ सिद्धार्थ उद्यान हाऊसफुल्ल

सिद्धार्थ उद्यान हाऊसफुल्ल, मोफत प्रवेशाचा नागरिकांची उचलला फायदा
म.टा. प्रतिनिधी, औरंगाबाद -
महापालिकेचे सिद्धार्थ उद्यान आणि प्राणिसंग्रहालय गुरुवारी हाऊसफुल्ल होते. पालिकेच्या वर्धापन दिनाच्या निमित्ताने तीन दिवस शहरवासियांसाठी उद्यान आणि प्राणिसंग्रहालयाचे प्रवेश शुल्क न आकारता सर्वांना मोफत प्रवेश देण्याची घोषणा महापौर नंदकुमार घोडेले यांनी केली होती. त्याची अंमलबजावणी आजपासून सुरू झाली. शुक्रवार आणि शनिवार असे दोन दिवसही प्राणिसंग्रहालय व उद्यान सर्वांसाठी विनामूल्य खुले राहणार आहे.
नागरिकांना आणि प्रामुख्याने बालगोपाळांना सिद्धार्थ उद्यान आणि प्राणिसंग्रहालयाचे आकर्षण आहे, परंतु दीड वर्षापूर्वी महापालिकेने या दोन्हीचे प्रवेश शुल्क वाढवले आहे. प्राणिसंग्रहालयाचे प्रवेश शुल्क दहा रुपयांवरून ५० रुपये तर उद्यानाचे प्रवेश शुल्क दहा रूपयांवरून २० रुपये करण्यात आले आहे. ११ वर्षापर्यंतच्या मुलांना प्रवेश शुल्क आकारले जात नाही. वर्धापन दिनाच्या निमित्ताने तीन दिवस प्रवेश शुल्क न आकारण्याचा निर्णय जाहीर करण्यात आला. त्यामुळे पहिल्याच दिवशी उद्यान आणि प्राणिसंग्रहालय हाउसफुल्ल झाले. पालिका प्रशासनाला गर्दीवर नियंत्रण ठेवण्यासाठी पोलिसांची मदत घ्यावी लागली. पुढील दोन दिवस नागरिकांची गर्दी जास्त होईल, असे गृहित धरून सुरक्षेच्या दृष्टीने आवश्यक ती खबरदारी घेण्याची सूचना महापौरांनी अधिकाऱ्यांना केली.