म. टा. प्रतिनिधी, औरंगाबाद
ट्रिपलसीट जाणाऱ्या दुचाकीस्वारांनी वाहतूक शाखेच्या पोलिस कर्मचाऱ्यास मारहाण केल्याची घटना गुरुवारी सकाळी पावणे बाराच्या सुमारास घडली. सिल्लेखाना येथील घटनेतील एका आरोपीस पकण्यात पोलिसांना यश आले तर उर्वरित दोन आरोपी दुचाकीसह पसार झाले.
वाहतूक शाखेचे पोलिस कर्मचारी गोकुळ चेळेकर व अशोक साळवे हे सिल्लेखाना सिग्नलवर सकाळी ड्यूटीवर होते. यावेळी एका दुचाकीवरून तीन तरुण जात असल्याचे दिसताच त्यांनी दुचाकी थांबविण्याचा इशारा केला. तथापि, दुचाकीस्वाराने पळून जाण्याचा प्रयत्न केला. पोलिस कर्मचारी चेळेकर यांनी त्यांना प्रयत्नपूर्वक पकडले व वाहतुकीचे नियम उल्लंघन केल्याप्रकरणी दंडात्मक कारवाईची प्रक्रिया सुरू केली. त्यावर ते तरुण संतप्त झाले. ‘चोरांना पकडा, आम्हाला का त्रास देता’, असे म्हणत त्यांनी पोलिसांशी हुज्जत घातली. त्यांनी पोलिसांना शिवीगाळही केली. एवढेच नव्हे तर धक्काबुक्की करीत मारहाण केली.
यातील दोन तरुण संधी साधून दुचाकीवर पळून गेले. तर मुझफ्फर गुलाम सादिक कुरेशी (वय २०, रा. सिल्लेखाना) यास पोलिसांनी पकडले. या घटनेची नियंत्रण कक्षाला माहिती देण्यात आली. त्यानंतर वाहतूक शाखेचे पोलिस निरीक्षक अविनाश आघाव, शकील कुरेशी यांनी घटनास्थळी धाव घेतली. या प्रकरणी क्रांतिचौक पोलिस ठाण्यात गुन्हा दाखल करण्यात आला आहे. हे आरोपी ट्रिपल सीट तर जात होतेच, शिवाय त्यांनी हेल्मेटही घातलेले नव्हते.