शरद पवारांविरोधात पँथर रस्त्यावर

शरद पवारांविरोधात पँथर रस्त्यावर
म. टा. प्रतिनिधी, औरंगाबाद
अॅट्रॉसिटी कायद्यासंदर्भात राष्ट्रवादी काँग्रेसचे नेते शरद पवार यांनी केलेल्या विधानाच्या निषेधार्थ पँथर सेनेने सोमवारी जोरदार निदर्शने करत पवार यांच्या विरोधात अॅट्रॉसिटी कायद्यानुसार गुन्हे दाखल करण्यात यावा, अशी मागणी केली.
अॅट्रॉसिटी कायद्यात सुधारणा करण्याची होणारी मागणी लक्षात घेऊन सरकारने गांभीर्याने विचार केला पाहिजे, कारणमीमांसा तपासून आवश्यक त्या ठिकाणी दुरुस्ती केली पाहिजे, असे प्रतिपादन राष्ट्रवादी काँग्रेसचे अध्यक्ष शरद पवार यांनी रविवारी केले होते. या विरोधात पँथर सेनेने निदर्शने केली. संघटनेचे महाराष्ट्र प्रमुख दिपक केदार, संघटना प्रमुख सतीश पट्टेकर, शहरप्रमुख शेख अशरफ, संदीप नाथभजन, आनंद लोखंडे आदी उपस्थित होते.
रिपब्लिकन पार्टी ऑफ इंडियाने केला निषेध -
अॅट्रॉसिटी कायद्यासंदर्भात राष्ट्रवादी काँग्रेसचे नेते शरद पवार यांनी केलेले वक्तव्य जातीय संघर्ष निर्माण करणारे आहे, असा आरोप रिपब्लिकन पार्टी ऑफ इंडियाचे (डेमोक्रॅटीक) प्रदेशाध्यक्ष रमेश गायकवाड यांनी एका पत्रकाद्वारे केला आहे. या वक्तव्याबाबत त्यांनी तीव्र शब्दात निषेध केला.