सुवर्णकार तरुणाची आत्महत्या

सुवर्णकार तरुणाची आत्महत्या
म. टा. प्रतिनिधी, औरंगाबाद
सराफा व्यवसाय करणाऱ्या तरुणाने गळफास घेत आत्महत्या केल्याचा प्रकार मंगळवारी सकाळी महावीर चौकाजवळील म्हाडा कॉलनी येथे उघडकीस आला. आत्महत्येचे कारण समजू शकले नसून या प्रकरणी क्रांतिचौक पोलिस ठाण्यात अकस्मात मृत्यूची नोंद करण्यात आली आहे.
व्यंकटेश भगवानराव जोजारे (वय ३५, रा. म्हाडा कॉलनी) असे या तरुणाचे नाव आहे. जोजारे यांचे नांदेड येथे सुवर्ण आभूषणे विक्रीचे दुकान आहे. त्यांचे आईवडील म्हाडा कॉलनी येथे राहतात. गणेशोत्सवानिमीत्त जोजारे आईवडिलांकडे आले होते. सोमवारी रात्री कुटुंबीयासोबत जेवण करून ते झोपी गेले होते. सकाळी साडेपाच वाजेच्या सुमारास त्यांनी घराच्या गॅलरीत असलेल्या हुकाला दोरीने गळफास घेत आत्महत्या केली. कुटुंबीयांच्या लक्षात हा प्रकार आल्यानंतर त्यांनी क्रांतिचौक पोलिसांना या घटनेची मा‌हिती दिली. पोलिसांनी जोजारे यांचा मृतदेह घाटी हॉस्पिटलमध्ये हलवला. व्यंकटेश जोजारे यांचा चार वर्षापूर्वी विवाह झाला असून त्यांना दोन वर्षाची संस्कृती नावाची मुलगी आहे. जोजारे यांच्या आत्महत्येचे कारण समजू शकले नाही.