दुचाकी पळवणारा तीन महिन्यानंतर जेरबंद

थाप मारून दुचाकी पळवणारा तीन महिन्यानंतर जेरबंद
तरुणांनी ३५ किलोमीटर पाठलाग करून केली अटक
म. टा. प्रतिनिधी, औरंगाबाद
दरवाजे बनवायची थाप मारून दुकानदाराला ऑर्डर देण्याच्या बहाण्याने शेवगावला नेत दुचाकी लंपास करण्यात आली होती. तीन महिन्यांपूर्वी मुकुंदवाडी येथील दुकानदारासोबत हा प्रकार घडला होता. या आरोपीला गुरुवारी दुकानदाराच्या नातेवाईकांनी अटक केली. ३५ किलोमीटर पाठलाग केल्यानंतर हा आरोपी हाती लागला. त्याला सिडको एमआयडीसी पोलिसांच्या ताब्यात देण्यात आले आहे.
मुकुंदवाडी चौकात कैसर शहा यांचे फायबरचे दरवाजे बनवायचे दुकान आहे. दीड महिन्यापूर्वी त्यांच्या दुकानात एक ग्राहक आला. ‘तुम्ही मोठ्या ऑर्डर घेता का’, असे ‌विचारत त्याने आपली छाप पाडली. ऑर्डर देण्याच्या बहाण्याने कैसर शहा यांच्या वडिलांच्या दुचाकीवर त्यांना पैठणपुढील शेवगाव येथे नेण्यात आले. ‘मी मालकाला घेऊन येतो’, असे सांगत शहा यांची दुचाकी घेऊन हा आरोपी पसार झाला. हा प्रकार तेथील एका सीसीटीव्ही कॅमेऱ्यात कैद झाला होता. याप्रकरणी शहा यांनी सिडको एमआयडीसी पोलिस ठाण्यात या आरोपीविरुद्ध गुन्हा दाखल केला होता. सीसीटीव्ही फुटेजवरून शहा यांचे नातेवाईक या आरोपीचा शोध घेत होते.
गुरुवारी सकाळी हा आरोपी दुचाकीसह सद्दाम शहा याला दिसला. त्याने तातडीने कैसर शहा व इतरांना फोन करून हा प्रकार सांगितला. यानंतर कैसर शहा मोहम्मद हबीब शेख, उमर शेख व अनवर शेख यांनी दोन दुचाकी व एका कारने या आरोपीचा शोध सुरू केला. पाठलाग होत असल्याचे संशयित आरोपीच्या लक्षात आले. चौका, लाडसावंगीमार्गे माऊली आडगावात या आरोपीने पलायन केले. आडगाव येथे त्याला पकडण्यात यश आले. या संशयित आरोपीचे नाव फकीर नागू इटकर (रा. अहमदनगर) असल्याची माहिती त्याच्याजवळ असलेल्या आधार कार्डवरून मिळाली. आरोपीला दुचाकीसह सिडको एमआयडीसी पोलिसांच्या स्वाधीन करण्यात आले आहे. पोलिस निरीक्षक श्रीपाद परोपकारी यांनी ही माहिती दिली.