नागरिकाला ३९ हजाराचा ऑनलाइन गंडा

नागरिकाला ३९ हजाराचा ऑनलाइन गंडा
म. टा. प्रतिनिधी, औरंगाबाद
एटीएम बंद पडल्याची थाप मारत टेलिफीशर अॅटॅकरने नागरिकाला ३९ हजारांचा ऑनलाइन गंडा घातला. बुधवारी सकाळी लक्ष्मी कॉलनी भागात हा प्रकार घडला. याप्रकरणी छावणी पोलिस ठाण्यात अज्ञात आरोपीविरुद्ध फसवणुकीचा गुन्हा दाखल करण्यात आला आहे.
राजकुमार संभाजी दुर्गे (वय ४७, रा. अशोक नगर, लक्ष्मी कॉलनी) यांना बुधवारी सकाळी अनोळखी मोबाइलधारकाचा फोन आला. तुमचे एटीएम कार्ड बंद पडले असून ते सुरू करायचे असल्यास एटीएम कार्ड क्रमांक व आधार कार्डचा क्रमांक सांगा, असे त्याने सांगितले. दुर्गे यांना हा प्रकार खरा वाटल्याने त्यांनी समोरील व्यक्तीला ही माहिती दिली. यानंतर दुर्गे यांच्या आयसीआयसीआय बँकेच्या खात्यातून ३९ हजार २३३ रुपयांची रक्कम ऑनलाइन काढून घेण्यात आली. हा प्रकार लक्षात येताच दुर्गे यांनी पोलिस ठाणे गाठून तक्रार दाखल केली.