व्हिडिओकॉनमध्ये चोरी गेलेला मुद्देमाल हस्तगत

व्हिडिओकॉनमध्ये चोरी गेलेला मुद्देमाल हस्तगत
म. टा. प्रतिनिधी, औरंगाबाद
चित्तेगाव येथील व्हिडिओकॉन कंपनीतून ४१ हजार रुपये किंमतीचे मोबाइल अॅक्सेसरीज व इतर साहित्य लंपास केल्याप्रकरणी ९ कंत्राटी कामगारांना अटक करण्यात आली आहे. त्यांच्याकडून मुद्देमाल हस्तगत करण्यात आल्याची माहिती बिडकीन पोलिसांनी दिली.
लुपतर्शी मोहंतो ( वय २०), देवीप्रसाद मोहंतो ( वय २२), मालियाकुमार पिताबंर नायक ( वय २४), कमल मोहंतो ( वय २२), मनोरंजन महापात्रा ( वय २०), शेख इलियास जाफर शेख सलीम (वय २१), प्रकाश अजितकुमार गिरी ( वय २१), बालीया रवींद्र सोरेन (वय १९, सर्व रा. टीव्ही सेंटर) आणि लक्ष्मण हेंबराम ( वय २१ रा. रोजाबाग) अशी संशयितांची नावे आहेत. जून २०१६ पासून ते कंत्राटी कामगार म्हणून व्हिडिओकॉन कंपनीत कामास आहेत. २२ नोव्हेंबर रोजी सकाळी साडे सात वाजेच्या सुमारास कंपनी प्रवेशद्वारावर सुरक्षा अधिकारी भगवान वाघ यांनी कर्मचाऱ्यांची नेहमीप्रमाणे तपासणी केले. त्यावेळी कंत्राटी कामगार लुपतर्शी मोहंतो यांच्याकडे मोबाइल विभागातील मेमरीकार्ड आढळून आले. संशय आल्याने वाघ यांनी संबंधित विभागाची तपासणी केली असता सुमारे ४१ हजार रुपये किमंतीचे मोबाइल अॅक्सेसरीज व इतर साहित्य कमी असल्याचे स्पष्ट झाले. लुपतर्शी व त्यांच्या अन्य साथीदारांनी मिळूनच ही चोरी केली असावी, असा संशय सुरक्षारक्षक अधिकारी वाघ यांनी व्यक्त करत बिडकीन पोलिसांकडे धाव घेतली.
त्यावरून गुन्हा दाखल करत पोलिसांनी सर्व नऊ संशयितांना अटक केले. घरझडतीत त्यांच्याकडे चोरीचा सर्व मुद्देमाल सापडला. कोर्टाच्या आदेशाने त्यांची रवानगी हर्सूल कारागृहात करण्यात आली आहे, अशी माहिती तपास अधिकारी प्रकाश शिंदे यांनी दिली.