महिला पोलिसाची आत्महत्या

महिला पोलिसाची आत्महत्या
सासरच्या छळाला कंटाळून आत्महत्या केल्याचा आरोप
म. टा. प्रतिनिधी, औरंगाबाद
पोलिस अधिक्षक कार्यालयातील विशेष शाखेत पोलिस नाईक पदावर कार्यरत असलेल्या परवीन मोईस बेग (वय ३४, रा. जटवाडा रोड) यांनी रविवारी (१८ डिसेंबर) दुपारी साडे बाराच्या सुमारास गळफास घेऊन आत्महत्या केली. सासरच्या छळाला कंटाळून परवीन बेग यांनी आत्महत्या केल्याचा आरोप नातेवाईकांनी केला आहे. या प्रकरणी रात्री उशिरापर्यत गुन्हा दाखल करण्यात आला नव्हता.
स्थानिक गुन्हे शाखेतील मोईस बेग यांच्या पत्नी परवीन या विशेष शाखेत कार्यरत होत्या. परवीन यांचे आज सकाळी सासरच्या मंडळीशी घरगुती कारणातून भांडण झाले होते. भांडणाच्या कारणातून परवीन यांनी बेडरुममधील छताला गळफास घेतला. हा प्रकार उघडकीस आल्यानंतर बेग कुटुंबियांनी परवीन यांना तात्काळ घाटीत दाखल केले. मात्र, डॉक्टरांनी त्यांना मृत घोषित केले. परवीन यांच्या भावाचे पुढच्या महिन्यात लग्न आहे. त्याच्या लग्नासाठी परवीन पैशांची जमवाजमव करत होत्या. परवीन यांनी सासरच्या छळाला कंटाळून आत्महत्या केल्याचा आरोप त्यांच्या कुटुंबीयांनी केला आहे. या प्रकरणी बेगमपुरा पोलिस ठाण्यात अकस्मात मृत्यूची नोंद करण्यात आली आहे.