धनादेश अनादरप्रकरणी तीन महिने सक्तमजुरी

धनादेश अनादरप्रकरणी तीन महिने सक्तमजुरी
म. टा. प्रतिनिधी, औरंगाबाद
वाहन कर्जाची परतफेड करण्यासाठी दिलेला धनादेश न वटल्यामुळे आरोपी सईद इस्लाऊद्दीन सल्लाऊद्दीन यास तीन महिने सक्तमजुरी व एक लाख रुपये दंडाची शिक्षा प्रथम वर्ग न्यायदंडाधिकारी रितेश मावतवाल यांनी ठोठावली.
आरोपी सईद इस्लाऊद्दीन (रा. सब्जी मंडी, पैठण गेट, खोकडपुरा) याने ‘श्रीराम सिटी युनियन फायनान्स’कडून कार घेण्यासाठी कर्ज घेतले होते. आरोपीने चार महिने नियमित हप्ते भरल्यानंतर हप्ते थकले. कंपनीने विचारणा करुनही हप्ते न भरल्याने आरोपीला नोटीस पाठविण्यात आली. त्यानंतर आरोपीने कर्ज फेडीसाठी ८० हजार रूपयांचा धनादेश दिला. मात्र धनादेश न वटल्याने आरोपीला कायदेशीर नोटीस बजावण्यात आली. अखेर प्रकरण कोर्टात गेल्यानंतर कोर्टाने आरोपीला वरील प्रमाणे शिक्षा सुनावली. कंपनीच्या वतीने अॅड. राहूल प्रल्हाद मोटे यांनी बाजू मांडली, तर विधी अधिकारी दीपक दादाराव कणसे यांनी कोर्टात साक्ष दिली. या प्रकरणी पाच हजार रूपये कॉस्ट म्हणून भरण्याचे आदेश कोर्टाने दिले असून, धनादेशाच्या दुप्पट रक्कम १ लाख ६० हजार रुपये कंपनीला देण्याचे आदेश दिले आहे.