दोन घटनांत ७३ हजारांचा ऐवज लंपास

दोन घटनांत ७३ हजारांचा ऐवज लंपास
उस्मानपुरा, हर्सूल भागातील घटना
म. टा. प्रतिनिधी, औरंगाबाद
दोन वेगवेगळ्या घटनांत चोरट्यांनी ७३ हजारांचा ऐवज लंपास केला. उस्मानपुरा व हर्सूल भागात हे प्रकार घडले. या प्रकरणी सबंधित पोलिस ठाण्यात गुन्हे दाखल करण्यात आले आहेत.
उस्मानपुरा परिसरातील महिला कुटुंबासह गेल्या बुधवारी बाहेरगावी गेली होती. रविवारी हे कुटुंब घरी परतले. या दरम्यान चोरट्यांनी त्यांच्या घराचे कुलूप तोडून आतमध्ये प्रवेश केला. कपाटातील सोन्याची पोत, अंगठी, गंठण असा ६१ हजार ५०० रुपयांचा ऐवज चोरट्यानी लंपास केला. महिलेच्या तक्रारीवरून उस्मानपुरा पोलिस ठाण्यात चोरीचा गुन्हा दाखल करण्यात आला आहे. पीएसआय बहूरे या प्रकरणी तपास करीत आहेत.
चोरीचा दुसरा प्रकार हर्सूल भागात घडला. एका जेष्ठ नागरिक महिलेच्या दुकानातून चोरट्यांनी ड्रॉवरमधील साडेबारा हजार रुपये असलेली पर्स लंपास केली. रविवारी दुपारी हा प्रकार घडला. या पर्समध्ये एटीएम कार्ड, आधार कार्ड, इलेक्शन कार्ड, पॅन कार्ड आदी महत्वाची कागदपत्रे होती. या महिलेच्या तक्रारीवरून हर्सूल पोलिस ठाण्यात गुन्हा दाखल करण्यात आला आहे. सहायक फौजदार बिघोत या प्रकरणी तपास करीत आहेत.