१५० कोटींचा रस्त्यांसाठी ‘डीपीआर’

१५० कोटींचा रस्त्यांसाठी ‘डीपीआर’
फेब्रुवारीत शासनाकडे सादर करणार

म. टा. प्रतिनिधी, औरंगाबाद

शहरातील रस्ते विकासासाठी १५० कोटींचा सविस्तर प्रकल्प अहवाल (डीपीआर) तयार करण्याचे काम महापालिकेत युद्धपातळीवर सुरू आहे. फेब्रुवारीच्या पहिल्या आठवड्यात शासनाकडे हा डीपीआर सादर केला जाणार आहे.

महापौर भगवान घडमोडे यांनी याबद्दल माहिती दिली. यावेळी आयुक्त ओम प्रकाश बकोरिया देखील उपस्थित होते. रस्ते विकासासाठी महापालिकेला भरीव निधी देण्याचा शब्द मुख्यमंत्री देवेंद्र फडणवीस यांनी दिला आहे. किमान १०० कोटी रुपयांची तरतूद, राज्य सरकार अर्थसंकल्पाच्या वेळी रस्ते विकासाच्या कामासाठी करेल, असे संकेतही मिळाले आहेत. त्यामुळे रस्ते विकासाचा प्रकल्प अहवाल तयार करण्यासाठी पालिकेची यंत्रणा कामाला लागली आहे. एका खासगी संस्थेकडून प्रकल्प अहवाल तयार करून घेण्याचे काम सुरू आहे. या संदर्भात महापौर म्हणाले, लवकरात लवकर प्रकल्प अहवाल तयार व्हावा यासाठी प्रयत्न केले जात आहेत. शहरातील प्रमुख रस्त्यांचाच समावेश या अहवालात केला जाणार आहे.

वर्दळीचे रस्ते, ऐतिहासिक स्थळांकडे जाणारे रस्ते आणि मुख्य रस्ते शासनाच्या निधीतून व्हावेत, असा प्रयत्न आहे. त्यामुळे येत्या काही वर्षांत शहराचा चेहरामोहरा बदलेल. चांगल्या रस्त्यांचे शहर अशी औरंगाबादची ओळख निर्माण होऊ शकेल.