सेनेला सोबत घेण्याचे भाजपचे संकेत

सेनेला सोबत घेण्याचे भाजपचे संकेत

म. टा. प्रतिनिधी, औरंगाबाद

जिल्हा परिषदेचा अध्यक्ष भाजपचाच होणार, असा दावा जिल्हाध्यक्ष एकनाथ जाधव यांनी केला आहे. सोबत यायचे कि किंवा नाही याचा निर्णय शिवसेनेने घ्यावा, आम्ही त्यांना सोबत घेण्यास तयार आहोत, असेही त्यांनी शुक्रवारी मटाशी बोलताना सांगितले.

औरंगाबाद जिल्हा परिषदेच्या इतिहासात प्रथमच भारतीय जनता पक्षाने २२ जागा जिंकून अव्वल स्थान पटकावले आहे. शिवसेना १८ जागांसह दुसऱ्या क्रमांकावर आहे. गेल्या निवडणुकीत भाजपला फारसा प्रभाव दाखवता आला नव्हता. यावेळी मात्र, ग्रामीण भागात त्यांनी मुसंडी मारल्याने कार्यकर्त्यांमध्ये मोठा उत्साह आहे. झेडपीचे अध्यक्षपद भाजपकडेच असेल असे जिल्हाध्यक्ष जाधव यांनी सांगितले. यासाठी आवश्यक ते प्रयत्न सुरू केले आहेत. आमच्याकडे अनेक चांगले सदस्य असून त्यापैकी कोणाची निवड होणार याचा निर्णय कोअर कमिटीच्या बैठकीत घेतला जाईल, असेही त्यांनी नमूद केले.

शिवसेना भाजप या दोन्ही पक्षांची युती अनेक वर्षांपासूनची आहे. यंदा स्वतंत्रपणे निवडणूक लढविली असली तरी त्यांना सोबत घेण्याची आमची तयारी आहे. तथापि, सोबत येण्याबाबतचा निर्णय त्यांनाच घ्यायचा आहे, असेही त्यांनी स्पष्ट केले.