शहरातील पक्ष्यांची मोजणी होणार

शहरातील पक्ष्यांची मोजणी होणार

एन्‍व्हायरमेंटल रिसर्च फाउंडेशन अँड एज्युकेशनल अकॅडमी, गरवारे कम्युनिटी सेंटरचा संयुक्त उपक्रम

म. टा. प्रतिनिधी, औरंगाबाद

एन्‍व्हायरमेंटल रिसर्च फाउंडेशन अँड एज्युकेशनल अकॅडमी आणि गरवारे कम्युनिटी सेंटर यांच्या संयुक्त विद्यमाने कॉमन बर्ड मॉनिटरिंग प्रोग्रॅम अंतर्गत चिमणी, कावळा, पोपट अशा पक्ष्यांची माहिती गोळा करणार आहे. या उपक्रमाची सुरुवात २० मार्च साजरा होत असलेल्या जागतिक चिमणी दिनानिमित्ताने होत आहे. या उपक्रमासाठी महाराष्ट्र टाइम्स मीडिया पार्टनर आहे.

दिवसेंदिवस निर्माण होत असलेल्या पर्यावरणाच्या समस्यांमुळे चिमण्या, कावळे आणि इतर पक्ष्यांची संख्या कमी होताना दिसत आहे. चिमणी शहरात एखाद्यावेळी नजरेस पडते. हे पक्षी निसर्गाच्या अन्नसाखळीत अत्यंत महत्त्वाचे घटक आहेत. पर्यावरण संवर्धन संरक्षणात त्यांचे महत्त्व लक्षात घेता हा उपक्रम औरंगाबाद शहरात घेण्यात येत आहे.

नेहमी दिसणाऱ्या पक्ष्यांची माहिती संकलन करण्याचा उपक्रम प्रथमच औरंगाबाद शहरात एन्‍व्हायरन्मेंटल रिसर्च फाउंडेशन अँड एज्युकेशनल अकॅडमीमार्फत घेण्यात येणार आहे. पक्ष्यांच्या नोंदी कशा घ्यायच्या, पक्षी कसे ओळखायचे व पक्ष्यांचे महत्त्व याबाबत येत्या २० मार्चला गरवारे कम्युनिटी सेंटर येथे एक खास प्रशिक्षण देण्यात येणार आहे. हे प्रशिक्षण मोफत असून या उपक्रमात भाग घेणाऱ्यांना नेहमी दिसणाऱ्या पक्ष्यांची यादी रंगीत चित्रांसह मोफत दिली जाईल. या नावीन्यपूर्ण उपक्रमात सर्वांनी जास्तीत जास्त संख्येने उपस्थित रहावे, असे आवाहन संस्थेचे डॉ. दिलीप यार्दी, सुनील सुतवणे आणि प्रसाद गुरू यांनी केले आहे.

घरटी करण्याचे प्रशिक्षण

जागतिक चिमणी दिनामित्त ERFEA आणि गरवारे कम्युनिटी सेंटरच्यावतीने सोमवारी २० मार्च २०१७ रोजी कृत्रिम घरटी तयार करण्याची विनामूल्य प्रशिक्षण कार्यशाळा घेतली जाणार आहे. तसेच आपल्या अवतीभवती नेहमी दिसणाऱ्या पक्ष्यांची माहिती संकलित कशी करायची व त्यांच्या नोदी कशा घ्यायच्या याबाबतची माहिती रंगीत स्लाइड दाखवून देण्यात येईल. हा कार्यक्रम सायंकाळी ४ वाजता होणार असून महाराष्ट्र टाइम्स या कार्यक्रमाचा मीडिया पार्टनर आहे.

याप्रसंगी गरवारेचे सुनील सुतवणे, मानद वन्यजीव रक्षक दिलीप यार्दी यांची प्रमुख उपस्थिती राहणार आहे.

२० मार्च हा जागतिक चिमणी दिन म्हणून साजरा होतो. यानिमित्त होणाऱ्या कार्यशाळेत टाकाऊपासून सुबक घरटी साकारण्याचे प्रशिक्षण देण्यात येणार आहे. ही कार्यशाळा सर्व वयोगटांसाठी आहे. शहरवासीयांनी या कार्यशाळेचा लाभ घ्यावा, असे आवाहन संयोजनक बी. यू. पाठक व अमेय देशपांडे यांनी केले आहे.