औषध विक्रेत्यांच्या संपाला संमिश्र प्रतिसाद

औषध विक्रेत्यांच्या संपाला संमिश्र प्रतिसाद

म. टा. प्रतिनिधी, औरंगाबाद

बेकायदेशिररित्या चालविल्या जात असलेल्या ऑनलाइन फार्मसी व केंद्र सरकारच्या आरोग्य खात्याने प्रसिद्ध केलेल्या नोटीसच्या विरोधात पुकारण्यात आलेल्या फार्मसिस्ट अँड केमिस्टच्या बंदला मंगळवारी (३० मे) संमिश्र प्रतिसाद मिळाला.

या संपात औरंगाबाद जिल्हा केमिस्ट अँड ड्रगिस्ट असोसिएशनने सहभाग घेतल्याने जिल्ह्यातील शहरी व ग्रामीण भागातील औषध विक्रेत्यांनी औषध दुकाने बंद ठेवली. दुपारनंतर काही ठिकाणी दुकाने उघडण्यात आली. शहरातील दलालवाडी भागात असलेल्या केमिस्ट अँड ड्रगिस्ट असोस‌िएशनच्या औषधी भवनमधील होलसेल औषध विक्रेत्यांची दुकाने बंद ठेवण्यात आली होती. जिल्ह्यातील १५०० दुकानधारकांनी यात भाग घेतला, असे असोसिएशनतर्फे सांगण्यात आले. जिल्हाधिकारी आणि अन्न व औषध प्रशासनाला असोस‌िएशनतर्फे निवदेन देण्यात आले. यावेळी विविध औषधविक्रेते उपस्थित होते. या आंदोलनामध्ये राज्यभरातील राज्य केमिस्ट संघटनेचे ५५ हजार औषध विक्रेते सहभागी होते, असे संघटनेचे सचिव अनिल नावंदर यांनी सांगितले. देशामध्ये सरकार ई फार्मसी व ई पोर्टल लागू करण्याची योजना आखत असल्याच्या निषेधार्थ हा बंद पुकरण्यात आला असून संपामध्ये सर्वच औषध विक्रेत्यांनी सहभाग घेतला, असे स्थानिक संघटनेचे अध्यक्ष रावसाहेब खेडकर यांनी सांगितले. दुसरीकडे घाटी प्रशासनाचा मेडिकल विभाग, जिल्हा चिकित्सालय आणि ज्या मेडिकलला २४ तास दुकान उघडे ठेवण्यात आली होते. रुग्णांना, त्यांच्या नातेवाईकांना फारसा त्रास झाला नाही.