सफारी पार्कसाठी आणखी ५० एकर जागा

सफारी पार्कसाठी आणखी ५० एकर जागा
औरंगाबाद : मिटमिटा येथे महानगरपालिकेला सफारी पार्कसाठी १०० एकर जागा देण्यात आल्यानंतर आता आणखी ५० एकर जागा देण्यात येणार असून या जागेच्या मोजणीचा प्रस्ताव तहसील कार्यालयाने भूमीअभिलेख कार्यालयाला पाठवला असल्याची माहिती तहसीलदार रमेश मुंडलोड यांनी दिली.
मिटमिटा येथे सफारीपार्क उभारण्यासाठी जिल्हा प्रशासनाने महापालिकेला १०० एकर जागा याआधीच दिली असून जिल्हा नियोजन समितीतून या जागेवर कंपाउंड तयार करण्यासाठी निधीही दिला आहे. महापालिकेने सफारी पार्कसाठी आणखी ५० एकर जागेची आवश्यकता असल्याची मागणी जिल्हा प्रशासनाकडे केली होती. जिल्हा प्रशासनाने त्यासंदर्भात हालचाली सुरू केल्या असून मिटमिटा येथील ५० एकर जमीन मोजणीसाठी तहसील विभागाकडून पत्र भूमीअभिलेख कार्यालयाला पाठवण्यात आले आहे. मोजणी झाल्यानंतर ही जमीन महापालिकेला हस्तांतरित केली जाईल. सिद्धार्थ उद्यान प्राणिसंग्रहालयात जागा अपुरी पडत असल्याने बऱ्याच दिवसांपासून हे प्राणिसंग्रहालय इतरत्र हलविण्यासाठी महापालिका प्रशासनाकडून प्रयत्न केले जात होते. सिद्धार्थ उद्यान प्राणिसंग्रहालय शहराच्या मध्यवर्ती भागात असून या प्राणिसंग्रहालयातील प्राण्यांना जागा अपुरी पडत आहे. सर्व वन्यप्राण्यांना पुरेशी जागा, नैसर्गिक वातावरण मिळू शकेल अशा ठिकाणी प्राणिसंग्रहालय स्थलांतरित करण्याचे सेंट्रल झू ऍथॉरिटीने निर्देश दिले होते. यानंतर पालिका प्रशासनाने सफारी पार्क उभारण्याचा निर्णय घेतला होता.