क्रेडाईचे ‘ड्रीम होम’ प्रदर्शन २१ सप्टेंबरपासून
म. टा. प्रतिनिधी, औरंगाबाद
औरंगाबाद शहरातील घर घेऊ इच्छिणाऱ्यांसाठी एक आनंदाची बातमी आहे. क्रेडाई या बांधकाम व्यावसायिकांच्या संघटनेतर्फे २१ सप्टेंबर ते २४ सप्टेंबरपर्यंत ‘ड्रीम होम-२०१७’चे आयोजन करण्यात आल्याची माहिती क्रेडाई औरंगाबादचे अध्यक्ष रवी वट्टमवार यांनी मंगळवारी दिली.
वट्टमवार म्हणाले, क्रांतीचौकातील हॉटेल मॅनॉर लॉन्स येथे सकाळी १० ते रात्री ९ पर्यंत हे प्रदर्शन असेल. या प्रदर्शनात ५७ क्रेडाई सभासद, २० ते २५ बँका आणि वित्तीयसंस्था, बिल्डिंग मटेरिअल सप्लायर्स, सरकारी संस्था, म्हाडा, सिडको, ऑरिक, मनपा, एमएसईबी यांची दालने असणार आहेत. याशिवाय पेंटस्, किचन ट्रॉलीज, अॅल्युमिनियम, ग्लास विंडोज, सॅनिटरी, इंटेरिअर डिझयानर्स आदींची दालनेही या ड्रीम होम प्रदर्शनात असणार आहे.
३०० हून अधिक स्कीमची माहिती या प्रदर्शनातून दिली जाईल. रेरा, महारेरा, जीएसटी, नोटबंदी आणि मंदी यासारख्या अडथळ्यांवर मात करत हे प्रदर्शन पहिल्यांदा होत असल्याचे वट्टमवार यांनी सांगितले. शहरातील ग्राहकांना सध्या या प्रदर्शनातून दाखविण्यात येत असलेल्या स्कीममध्ये पंतप्रधान आवास योजनेचाही फायदा होऊ शकतो. शहराचे स्मार्ट सिटीत होणारे रुपांतर, शहर परिसरात डीएमआयसी, राष्ट्रीय महामार्गाचे जाळे, शहराजवळच येणार जेएनपीटीचा ड्रायपोर्ट प्रोजेक्ट यामुळे शहराचे औद्योगिक आणि व्यापारीदृष्ट्या असलेले महत्व वाढत आहे. या पार्श्वभूमीवर घर खरेदीला वाव येणार आहे. रिअल इस्टेटमध्ये गुंतवणूक करण्यास अत्यंत पोषक वातावरण आहे.
ड्रीम होम प्रदर्शनासाठी आयोजित प्रत्रकार परिषदेस आशुतोष नावंदर, प्रमोद खैरनार, राजेंद्रसिंग जबिंदा, जितेंद्र मुथा, देवानंद कोटगिरे, पापालाल गोयल, सुनील पाटील, विकास चौधरी, नितीन बगाडिया, भास्कर चौधरी, संग्राम पटारे, सुनील बेदमुथा, रामेश्वर भारूका, संभाजी अतकरे, अनिल अग्रहाकरकर, नीलेश अग्रवाल, अखिल खन्ना, विजय सक्करवार, गोपेश यादव, पंजाबराव तौर, रोहित सूर्यवंशी, प्रशांत अमिलकंठवार, संदेश झांबड, बालाजी येरावार,अर्चित भारूका, अंकित अग्रवाल, उदय कासलीवाल, प्रितेश धानुका यांची उपस्थिती होती.