विद्यार्थ्यांच्या हवाई सफरीत तारखेचा घोळ

विद्यार्थ्यांच्या हवाई सफरीत तारखेचा घोळ
म. टा. प्रतिनिधी, औरंगाबाद
विद्यार्थ्यांच्या हवाई सफरीसाठी प्रायोजक मिळाला, पण आता ही सफर केव्हा करायची याबद्दल घोळ सुरू झाला आहे. त्यामुळे महापालिका प्रशासन गुणवंत विद्यार्थ्यांची थट्टा करीत असल्याचे बोलले जात आहे.
महापालिका शाळेतील विद्यार्थ्यांना स्पर्धा परीक्षेला सामोरे जाता यावे, त्यांच्यात आत्मविश्वास निर्माण व्हावा या उद्देशाने तत्कालीन आयुक्त ओम प्रकाश बकोरिया यांनी पालिका शाळेतील विद्यार्थ्यांची तीन स्तरावर परीक्षा घेतली. स्पर्धा परीक्षेच्या धर्तीवर घेण्यात आलेल्या परीक्षेतून गुणवत्तेनुसार दहा विद्यार्थ्यांची निवड करण्यात आली. या गुणवंत विद्यार्थ्यांना विमानाने दिल्लीला नेऊन दिल्ली दर्शन घडविण्याची घोषणा त्यावेळी करण्यात आली होती. दिल्लीवारीचा खर्च महापालिकेच्या तिजोरीवर पडू नये यासाठी प्रायोजक शोधण्याचा निर्णय घेण्यात आला. स्मार्टसिटी प्रकल्पासाठी महापालिकेला शासनाकडून मोठा निधी मिळाला आहे. हा निधी महापालिकेने एस बँक मध्ये ठेवला आहे. एकाचवेळी मोठा निधी बँकेला ठेव म्हणून मिळाल्यामुळे बँकेने विद्यार्थ्यांच्या विमान प्रवासासाठी प्रायोजकत्व स्वीकारावे अशी गळ पालिकेने बँकेच्या व्यवस्थापनाला घातली. प्रायोजकत्व स्वीकारण्याचा निर्णय घेण्यासाठी बँकेने बराच वेळ घेतला. गेल्या काही दिवसांपूर्वी प्रायोजकत्व स्वीकारत असल्याचे बँकेने महापालिकेला कळविले आहे. त्यामुळे विद्यार्थ्यांची विमान सफर निश्चित झाली आहे.
दसरा ते दिवाळीच्या दरम्यान विद्यार्थ्यांना दिल्ली दर्शन घडविण्याचे कच्चे नियोजन पालिकेच्या प्रशासनाने केले आहे. दहा विद्यार्थ्यांसह शिक्षण विभागाचे चार कर्मचारी आणि काही पदाधिकारी देखील दिल्लीला जाणार असल्याची माहिती मिळाली आहे. विमान सफरीची नेमकी तारीख मात्र अद्याप ठरलेली नाही. पदाधिकाऱ्यांच्या तारखा ठरल्यावर विमान सफरीची तारीख ठरवली जाणार आहे. प्रायोजक मिळाला, पण विमान सफरीची ताराखी ठरत नसल्यामुळे पालिका प्रशासन गुणवंत विद्यार्थ्यांची थट्टा करीत असलाचे बोलले जात आहे.