ओवेसींनी केली गोंधळी नगरसेवकांची कानउघडणी

ओवेसींनी केली गोंधळी नगरसेवकांची कानउघडणी
चाय पे चर्चेद्वारे केले एमआयएम नगरसेवकांचे प्रबोधन
म. टा. प्रतिनिधी, औरंगाबाद ः
‘जनतेने तुम्हाला त्यांची कामे करण्यासाठी निवडून दिले आहे. सभागृहात आपले मत मांडा, सत्ताधारी ऐकत नसतील तर सभात्याग करा. हे लोकशाहीचे मार्ग आहेत. सभागृहात गोंधळ घालण्यासाठी तुम्ही प्रतिनिधित्व करत नाहीत’, अशा शब्दात खासदार असदुद्दीन ओवेसी यांनी गोंधळी नगरसेवकांची कानउघडणी केली. एमआयएमच्या पद्धतीप्रमाणे सभेपूर्वी नगरसेवकांची प्रि मिटिंग झाली पाहिजे. या बैठकीत नगरसेवक उपस्थित राहत नसतील तर त्याचा अहवाल गटनेत्यांनी माझ्याकडे पाठवावा, असे आदेशही खासदार ओवेसी यांनी एमआयएम नगरसेवकांना दिले.
रविवारी (२९ ऑक्टोबर) नंदूरबार येथील आयोजित सभेत जाण्यासाठी एमआयएम प्रमुख खासदार असदुद्दीन ओवेसी शहरात आले होते. महापौर निवडणुकीनंतर एमआयएमचे नगरसेवकही नंदूरबारकडे गेले होते. तेथील सभेनंतर रविवारी रात्री उशिरा ओवेसींनी एका ढाब्यावर नगरसेवकांची बैठक घेतली. ‘चाय पे चर्चा’ सुरू झाल्यानंतर त्यांनी नगरसेवकांच्या कामाबाबत विचारणा केली. गेल्या काही दिवसांत सभागृहात गोंधळ घालणाऱ्या नगरसेवकांचे त्यांनी कान टोचले. सभागृह हे नागरिकांचे प्रश्न मांडून ते सोडविण्यासाठी आहे. सभागृहाचा अपमान होईल, तसेच जनतेच्या मनात पक्षाची प्रतिमा मलीन होईल, असे कोणतीही कृत्य पुढे घडू नये यासाठी काळजी घ्या. तसेच सभेपूर्वी पक्षाची प्रिमिटींग होणे आवश्यक आहे. या मिटींगला नियमित गैर हजर राहणाऱ्यांचा अहवाल सभागृह नेते नासेर सिद्दीकी यांनी पाठविण्याचे आदेशही ओवेसी यांनी दिले.
‌विरोधकांचा गुलाबाने स्वागत
खासदार ओवेसी हे एका ढाब्यावर थांबल्याची माहिती मिळताच, काही जण जमा झाले होते. त्यांनी ओवेसी विरोधात नारेबाजी करण्याचा प्रयत्न केला. घोषणाबाजी करणाऱ्या कार्यकर्त्यांचे नगरसेवक नासेर सिद्दीकी यांनी गुलाब पुष्प स्वागत करीत त्यांची समजूत काढली. काही वेळाने घोषणा देणारे निघून गेले अन् ताफा औरंगाबादकडे निघाला.