‘एसपीआय’ची अर्ज भरण्याची प्रक्रिया सुरू

‘एसपीआय’ची अर्ज भरण्याची प्रक्रिया सुरू
म. टा. प्रतिनिधी, औरंगाबाद
राष्ट्रीय संरक्षण प्रबोधिनीत (एनडीए) प्रवेशासाठी तयारी करून घेणाऱ्या औरंगाबादच्या सैनिकी सेवापूर्व प्रशिक्षण संस्थेच्या प्रवेशाची प्रक्रिया सुरू झाली आहे. २८ फेब्रुवारीपर्यंत विद्यार्थ्यांना ऑनलाइन, ऑफालाइन अर्ज भरता येणार आहे.
शासकीयस्तरावरील एकमेव असलेल्या या संस्थेमध्ये प्रवेशासाठी राज्यभरातील विद्यार्थ्यांची गर्दी होते. शैक्षणिक वर्ष २०१८-१९ या शैक्षणिक वर्ष प्रवेशासाठीची प्रक्रिया संस्थेने सुरू केली आहे. सध्या प्रवेशपूर्व परीक्षेसाठीचे अर्ज भरण्याची प्रक्रिया सुरू आहे. दहावीनंतर संस्थेत प्रवेश दिला जातो. दहावीच्या परीक्षार्थींच्या परीक्षा झाल्यानंतर एप्रिलमध्ये संस्थेतर्फे प्रवेशपूर्व परीक्षा घेतली जाते. या परीक्षेसाठी विद्यार्थ्यांना ऑनलाइन अर्ज भरण्याची प्रक्रिया उपलब्ध करून देण्यात आलेली आहे. तसेच ऑफलाइन अर्ज ही विद्यार्थ्यांना भरण्याची सोय आहे. २८ फेब्रुवारीपर्यंत विद्यार्थ्यांना अर्ज भरता येणार आहे. राष्ट्रीय संरक्षण प्रबोधिनीत प्रवेशासाठीची तयारी करून घेणाऱ्या या संस्थेने आजपर्यंत साडेचारशे पेक्षा अधिक लष्करी अधिकारी घडविले आहेत. विद्यार्थ्यांची वाढती संख्या लक्षात घेत संस्थेने मागील वर्षीपासून राज्यात चार शहरात परीक्षा सेंटरवरून परीक्षा घेण्याचे निश्चित केले. त्यानुसार ही परीक्षा होते. प्रारंभी प्रवेशपूर्व परीक्षा त्यातून उत्तीर्ण झालेल्या विद्यार्थ्यांची प्रत्यक्ष मुलाखत प्रक्रिया होते. त्यानंतर विद्यार्थ्यांची निवड केल्या जाते. साठ विद्यार्थ्यांना दरवर्षी प्रवेश दिला जातो. या प्रवेशासाठी यंदा एप्रिलमध्ये ही प्रवेशपूर्व परीक्षा होण्याची शक्यता आहे. ऑनलाइन अर्ज तसेच अधिक माहितीसाठी ww.spiaurangabad.com या वेबासाइटवर उपलब्ध असल्याचे संस्थेतील सूत्रांनी सांगितले.