​ खगोल अंतराळ विज्ञान केंद्राचे २२ डिसेंबरला उद्घाटन

खगोल अंतराळ विज्ञान केंद्राचे २२ डिसेंबरला उद्घाटन

शहराच्या वैभवात भर पडणार

म. टा. प्रतिनिधी, औरंगाबाद,

महात्मा गांधी मिशनच्या एपीजे अब्दुल कलाम खगोल अंतराळ विज्ञान केंद्र व क्लबचे शुक्रवारी (२२ डिसेंबर) उद्‍घाटन करण्यात येणार आहे. ‌भारत सरकारच्या विज्ञान व तंत्रज्ञान मंत्रालयाच्या विज्ञान प्रसार विभागाचे शास्‍त्रज्ञ डॉ. अरविंद रानडे यांच्या हस्ते हा उद्‍घाटन समारंभा होणार असल्याची माहिती पत्रकार परिषदेत केंद्राचे संचालक श्रीनिवास औंधकर यांनी दिली.‌

शहरातील शैक्षणिक संस्थांमधून कुलशल तंत्रज्ञ, अभियंते तयार होत असताना उपयोजित विज्ञानासोबत मूलभूत विज्ञानाची जोड असणे गरजेचे झाले आहे. ही गरज पूर्ण कण्यासाठी एमजीएमने या खगोल अंतराळ विज्ञान केंद्र व क्लबची उभारणी केली आहे. मराठवाड्यात अशा प्रकारचे हे पहिलेच केंद्र असून या केंद्रामुळे शहराच्या वैभवात भर पडणार आहे, असे ते म्हणाले.

या केंद्रामध्ये आदित्य सौर वेधशाळा, सायन्स पार्क, मराठवाड्यातील पहिलेच डिजिटल तारांगण, खगोलशास्‍त्र व भारतीय अंतराळ तंत्रज्ञान दालन, होलोग्राफी थिएटर, थ्रीडी थिएटर, अंकगणित तसेच भूमिती दालन व मूलभूत भौतिकशास्‍त्र विभागाची दोन भव्य दालने तयार करण्यात आली आहेत. प्रत्येक दालनामध्ये संबंधित विषयाची माहिती देण्यासाठी तज्‍ज्ञांची उपस्थिती राहणार आहे. खगोल अंतराळ विज्ञान केंद्रामध्ये तयार करण्यात आलेल्या बागेमध्ये भौतिकशास्‍त्र नियमावर आधारित विज्ञान खेळणी बसवण्यात आली असून शाळकरी विद्यार्थ्यांना या खेळण्यांवर खेळ खेळत मनोरंजक पद्धतीने भौतिकशास्‍त्र समजावून घेता येणार असल्याचे श्रीनिवास औंधकर यांनी सांगितले.