एटीएमकार्ड सोबत असूनही खात्यातून ३ लाख गायब; पोलिसांना वेगळाच संशय

औरंगाबाद: शहरात एक धक्कादायक प्रकार समोर आला असून एटीएम कार्ड सोबत असूनही एका सेवानिवृत्त सैनिकाच्या पत्नीच्या बचत खात्यातून तब्बल ३ लाख ६७ हजार रुपये लंपास झाल्याची घटना समोर आली आहे. तर हा प्रकार कार्ड क्लोनिंगचा प्रकार असण्याची शक्यता वर्तवली जात असून पोलिसांकडून अधिक तपास करण्यात येत आहे.

शहरातील सातारा परिसरातील स्नेहलता मनमोहन संत्रे यांनी पोलिसात दिलेल्या फिर्यादीनुसार, संत्रे यांचे पती सैन्यदलात होते. सेवानिवृत्त झाल्यानंतर त्याच्या पतीच २०१५ मध्ये निधन झाले. तेव्हापासून त्या मुलांसोबत सातारा परिसरात राहतात. दरम्यान त्यांच्या बँक खात्यात ३ लाख ६७ हजार ६७४ रुपये जमा होते. पण गरज नसल्याने त्यांनी अनेक दिवसांपासून खात्यातून रक्कम काढलेली नव्हती. मात्र, ६ जानेवारी रोजी सकाळी स्नेहलता घरात असताना त्यांच्या मोबाइलवर एटीएमद्वारे १० हजार रुपये काढल्याचा एसएमएस आला. त्यामुळे त्यांना धक्काच बसला. कारण बँकेचे एटीएम कार्ड स्वतःजवळ असताना रक्कम कशी काढली असा प्रश्न त्यांना पडला.

वाचाः अखेर 'त्या' बहुचर्चित कॉलनीवर पडणार हातोडा; न्यायालयाने याचिका फेटाळली

त्यामुळे स्नेहलता यांनी तात्काळ मुलाला सोबत घेऊन संबधित बँक गाठली बँक मॅनेजरकडे घडलेला प्रकार सांगत तक्रार केली.तेव्हा बँक अधिकाऱ्यांनी तपशील तपासला असता २१ डिसेंबर २०२१ ते ६ जानेवारी २०२२ पर्यंत संत्रे यांच्या खात्यातून तब्बल ३ लाख ६३ हजार १४७ रुपये काढण्यात आल्याचे समोर आले. यामुळे आपली फसवणूक झाल्याचे लक्षात येताच, स्नेहलता यांनी सातारा पोलिस ठाणे गाठत तक्रार दिली.

वाचाः मराठवाड्याची आर्थिक घडी का विस्कटत चाललीय?; तरुणांची नोकरीसाठी वणवण