मुक्तांगणच्या उन्हाळी शिबिरात चिमुकल्यांनी लुटला आनंद

मुक्तांगणच्या उन्हाळी शिबिरात चिमुकल्यांनी लुटला आनंद
बँक व्यव्हारासह विविध प्रकारचे प्रशिक्षण
म. टा. प्रतिनिधी, औरंगाबाद
स्वातंत्र्य सैनिक कॉलनी येथील कै. आनंद कृष्ण वाघमारे वाचनालयाच्या वतीने दहा दिवसांचे उन्हाळी शिबिर घेण्यात आले. बुधवारी या शिबिराचा समारोप झाला. यामध्ये सहभागी झालेल्या ३५ मुलामुलींनी बँकेच्या भेटीसह विविध प्रकारच्या वस्तू बनवण्याचे प्रशिक्षण घेतले.
गेल्या ४५ वर्षांपासून स्वातंत्र्य सैनिक कॉलनीत कै. आ.कृ. वाघमारे वाचनालय सुरू आहे. या वाचनालयाच्या वतीने गेल्या दहा वर्षांपासून एप्रिल महिन्यात मुक्तांगण उन्हाळी शिबिराचे आयोजन करण्यात येते. १७ एप्रिलपासून या शिबिराला सुरुवात झाली होती. तीन ते पंधरा वयोगटातील विविध ३५ मुलामुलींनी या शिबिरात सहभाग नोंदवला. या दहा दिवसांत मुलांना बँकेच्या व्यवहाराची माहिती व्हावी या हेतूने देवगिरी बँकेत नेण्यात आले आले होते. तसेच सिद्धार्थ उद्यानात सहलीचे आयोजन करण्यात आले. टाकाऊ वस्तूपासून टिकाऊ वस्तू बनवणे, ग्रिटिंग, फ्लॉवरपॉट, फुले बनविणे, संस्कारक्षम गोष्टी सांगणे आदी गोष्टी शिकविण्यात आल्या. मुलांना दररोज आयोजकांच्या वतीने पौष्टिक अल्पोपहाराची देखील सोय करण्यात आली होती. बुधवारी शिबिराचा समारोप करण्यात आला. यावेळी सहभागी मुलामुलींनी नृत्य, गिते सादर केली. मुलांनी व पालकांनी यावेळी आपले मनोगत व्यक्त केले. सहभागी मुलामुलींनी भेटवस्तू देण्यात आल्या. या शिबीरासाठी संध्या स्नेही, वंदना देशपांडे, अंजली बोरीकर, राजेंद्र स्नेही, डॉ. अंजली कुलकर्णी, मंजू जोशी, सुप्रिया चौधरी, प्रकाश कोरान्ने, प्रदीप तत्सत, सुहास देशपांडे, माया भुसळे, केतकी जोशी व वैशाली डाके यांनी परिश्रम घेतले.