औट्रम घाटातील बोगद्याला अडथळा

औरंगाबाद: सोलापूर-धुळे राष्ट्रीय महामार्ग क्रमांक २११च्या तिसऱ्या पॅकेजचा सर्वात महत्त्वाचा टप्पा असलेल्या कन्नड येथील औट्रम घाटाच्या बोगद्याच्या कामाला यंदा करोनाचा फटका बसला आहे. केंद्र सरकारने करोना उपाययोजनेसाठी निधी वळविल्याने यंदा बोगद्याचे काम २०२० मध्ये सुरू झाले नाही. किमान पुढच्या वर्षी तरी या बोगद्याला निधी मिळणार काय, असा सवाल आता उपस्थित झाला आहे. रस्त्याचे काम पूर्णत्वाकडे असताना केवळ बोगद्याच्या कामामुळे विलंब होणार आहे.

सोलापूर-धुळे रस्त्यावरील औरंगाबाद-धुळे पॅकेजमधील औट्रम घाटाचा टप्पा सर्वात महत्त्वाचा आहे. डोंगर पोखरून त्यातून बोगदा करण्यासाठी राष्ट्रीय महामार्ग प्राधिकरणाने स्वित्झर्लंडच्या अँबार्क इंजीनिअरिंग कंपनीकडून 'डीपीआर' करून घेतला. सहा प्रकारचे डिझाइन बनविण्यात आले. 'एनएचएआय'ने निश्चित केलेल्या डिझाइननुसार घाटात बोगदा तयार करून त्यात सात किलोमीटरचा रस्ता प्रस्तावित आहे. घाटातून रस्ता करताना समुद्रसपाटीपासूनचे अंतर, डोंगरकडांची उंची, रस्ता दीर्घ काळापर्यंत सुरक्षित राहावा, यासाठी मोजमापानुसार बोगद्यातून पूल करण्याचे प्रस्तावित आहे. ज्यामुळे वाहनांच्या सुरक्षितेतला अधिक चांगला पर्याय उपलब्ध राहणार आहे. या कामासाठी ५५०० कोटी रुपये खर्च अपेक्षित आहे.

मार्च २०२० मध्ये जगभर करोनाचे संकट पसरले आणि विकासकामांचे प्राधान्यक्रम बदलले गेले. केंद्र सरकार, राज्य सरकारने विविध विकासकामांवरील निधी आरोग्यविषयक सुविधांकडे वळविला. त्यामुळे निर्माणाधीन रस्त्यांचे टप्पेनिहाय अनुदान देऊन मोठ्या कामांना तूर्तास ब्रेक लागला आहे. त्यामुळे कन्नड जवळील औट्रम घाटातील बोगद्याचे कामासाठी २०२० मध्ये काहीच हालचाल झाली नाही. परिणामी धुळे-सोलापूर रस्त्यावरील अन्य काम पूर्णत्वाकडे जात असताना औट्रम घाट बोगद्याच्या कामाला मात्र विलंब लागणार आहे. देशातील करोना परिस्थिती हळूहळू सुधारत आहे. त्या पार्श्वभूमीवर २०२१ मध्ये या कामासाठी निधी उपलब्ध व्हावा अशी अपेक्षा व्यक्त होत आहे.

असा असेल बोगदा

-दुभाजकासह बॅरेल

- तीन लेनचे बॅरेल

-पूर्ण बोगदा सात किलोमीटर लांबीचा

- बोगद्याच्या कामाची संयुक्त मोजणी

-भूसंपादन अंतिम टप्प्यात