म. टा. प्रतिनिधी, औरंगाबाद
विद्यार्थ्यांना शालेय शिक्षण घेताना अनेक उत्कंठावर्धक प्रश्न पडतात. या प्रश्नांचे व शंकांचे समर्पक व योग्य निरसन करण्यासाठी महात्मा गांधी मिशनतर्फे एपीजे अब्दुल कलाम खगोल अंतराळ विज्ञान केंद्र व क्लबची उभारणी केली आहे. येथे सोप्या भाषेत मुलभूत विज्ञान शिकण्यासाठी विद्यार्थ्यांची गर्दी होत आहे. या केंद्रामध्ये नुकतेच भौतिकशास्त्राचे ६८ प्रयोग, तर गणिताचे नवीन २४ उपकरणे सुरू करण्यात आल्याची माहिती केंद्राचे संचालक श्रीनिवास औंधकर यांनी पत्रकार परिषदेत दिली.
शैक्षणिक संस्थांमधून कुशल विद्यार्थी तयार होत असताना उपयोजित विज्ञानासोबत त्यांना मुलभूत विज्ञानाची जोड असणे आवश्यक आवश्यक झाले आहे, असे औंधकर यांनी सांगितले. २२ डिसेंबरपासून सुरू झालेल्या या केंद्रामधील संपूर्ण प्रयोग पाहण्यासाठी सुमारे सहा तास लागतात. विद्यार्थ्याला येथे आदित्य सौर वेधशाळा, सायन्स पार्क, मराठवाड्यात पहिल्यांदाच उभारण्यात आलेले डिजिटल तारांगण, खगोलशास्‍त्र-भारतीय अंतराळ तंत्रज्ञान-होलोग्राफी तंत्रज्ञान, थ्रीडी थिएटर पाहता येते. केवळ मुलभूत भौतिकशास्त्र विषयावर दोन स्वतंत्र दालने आहेत. प्रत्येक दालनामध्ये प्रयोगाविषयी सखोल माहिती देण्यासाठी सहा इन्‍स्ट्रक्टरचीही नेमणूक करण्यात आल्याची माहिती पत्रकार परिषदेत देण्यात आली. हे केंद्र सोमवार वगळता दररोज सकाळी साडेनऊ ते सायंकाळी साडेपाच या वेळेत सुरू राहणार आहे, असे सांगण्यात आले. या पत्रकार परिषदेसाठी डॉ. रेखा शेळके तसेच भाग्यश्री केंडे यांची उपस्थिती होती.