म. टा. प्रतिनिधी, औरंगाबाद
औरंगाबाद इंडस्ट्रियल टाउनशिप लिमिटेडतर्फे उभारण्यात येत असलेल्या 'ऑरिक-बिडकीन' या औद्योगिक क्षेत्राचे शनिवारी मुख्यमंत्री देवेंद्र फडणवीस, केंद्रीय वाणिज्य व उद्योगमंत्री सुरेश प्रभू यांच्या हस्ते भूमिपूजन करण्यात येणार आहे. सद्यस्थितीत या प्रकल्पाकरिता ९५ टक्के भूसंपादन झाले आहे.
शेंद्रा येथील 'ऑरिक सिटी'चे काम २० टक्के पूर्ण झाले आहे. बिडकीन परिसरात जमीन उंच-सखल आहे. जमिनीचे सपाटीकरण, तलाव निर्मिती, छोटे पूल, विहिरी आणि इतर पायाभूत सुविधांची उभारणी एल अँड टी कंपनीकडून केली जात आहे. या परिसरात तब्बल सहा हजार ६१४ कोटींची कामे करण्यात येणार आहेत. या कामांचे भूमिपूजन बिडकीन येथे शनिवारी दुपारी अडीच वाजता होणार आहे. कार्यक्रमाच्या अध्यक्षस्थानी विधानसभा अध्यक्ष हरिभाऊ बागडे हे राहणार आहेत. यावेळी राज्याचे उद्योगमंत्री सुभाष देसाई, जिल्ह्याचे पालकमंत्री डॉ. दीपक सावंत, उद्योग राज्यमंत्री प्रवीण पोटे-पाटील यांची प्रमुख उपस्थिती राहणार आहे. जिल्ह्यातील खासदार व आमदार हे विशेष निमंत्रित आहेत. याशिवाय औरंगाबाद इंडस्ट्रीयल टाऊनशिप लिमिटेडचे चेअरमन सुनील पोरवाल, 'डीएमआयसी'चे मुख्य कार्यकारी अधिकारी अल्केश शर्मा यांची उपस्थिती राहणार आहे.
\Bदृष्टीक्षेपात बिडकीन\B
बिडकीन परिसरात तीन टप्प्यांमध्ये विकासकामे केली जाणार आहेत. एक हजार हेक्टरवर पायाभूत सुविधांची उभारणी करण्यासाठी कंत्राटदाराला ७५० दिवसांचा कालावधी देण्यात आला आहे. या सुविधांच्या उभारणीनंतर दोष निवारण कालावधी चार वर्षांचा आहे. सुविधांच्या देखभाल-दुरुस्तीची जबाबदारी कंत्राटदारावर असल्याचे निविदेतच स्पष्ट करण्यात आले आहे.
\Bपायाभूत सुविधा
\B- रस्त्यांवर ११ पूल
- रस्त्यांची रुंदी १८, २४, ३०, ४५ आणि ६० मीटर
- ७ एमएलडी क्षमतेचे सीईपीटी
- ११ एमएलडी क्षमतेचे एसटीपी
- भूमिगत जलवाहिनी आणि विद्युतवाहिनी
- वीज वितरणाकरिता ८ सबस्टेशन