भाजप हाच मुख्य शत्रू; खासदार खैरेंचा आरोप

वैजापूर : ‘भाजप हाच शिवसेनेचा मुख्य शत्रू असून पैशाच्या जोरावर ते जिल्हा परिषद व पंचायत समिती निवडणुकीत उतरले आहेत,’ असा आरोप त्यांनी केला. शिवसेना उपनेते खासदार चंद्रकांत खैरे यांनी केला. जिल्हा परिषद व पंचायत समिती निवडणूक प्रचाराचा नारळ शुक्रवारी सराला बेट व लासूरगाव येथे फोडण्यात आला. याप्रसंगी ते बोलत होते. नोटबंदीमुळे जिल्ह्यातील २८ हजार कामगार घरी बेरोजगार झाल्याचा दावा त्यांनी यावेळी केला.

‘केंद्र व राज्य सरकार केवळ भाषणबाजी करून जनतेची दिशाभूल व फसवणूक करीत आहेत. तीच तीच भाषणे ऐकून कंटाळा आला आहे. नोटबंदीला ८० दिवस उलटूनही परिस्थितीत फरक पडलेला नाही. नोटबंदीमुळे कामगारांचे मोठे नुकसान झाले,’ असे खासदार खैरे म्हणाले. प्रचाराचा नारळ फोडण्याआधी वैजापूर शहरातील लाडगाव चौफुली पासून वाहनफेरी काढण्यात आली. सराला बेटाचे मठाधिपती रामगिरी महाराज यांचे उमेदवारांनी आशीर्वाद घेतले. जिल्हाप्रमुख अंबादास दानवे यांनी भाजपच्या अडीच वर्षांत काळात महागाई वाढल्याच आरोप केला. काळा पैसा, राम मंदिर, महागाई, भ्रष्टाचार या मुद्द्यावर निवडणूक जिंकली, पण एकाही आश्वासनाची पूर्तता केली नसल्याकडे लक्ष वेधले.

सभापती बदलून कमाई

‘काँग्रेस व राष्ट्रवादी काँग्रेसने जिल्हा परिषदेतील सत्ताकाळात एकही विकास काम केले नाही. राष्ट्रवादी काँग्रेसने पंचायत समितीत केवळ पैसे कमावण्याचे काम केले. दर सहा महिन्यांनी सभापती बदलून लाखो रुपये कमावले,’ असा आरोप माजी आमदार आर. एम. वाणी यांनी आमदार भाऊसाहेब चिकटगावकर यांचे नाव न घेता केला.