कॉपी प्रकरणावर बहिष्कार; पेच कायम

म. टा. प्रतिनिधी, औरंगाबाद

ज्युनिअर कॉलेजांमधील शिक्षकांचा उत्तरपत्रिका तपासणीवर बहिष्कार कायम आहे. त्यामुळे बारावी उत्तरपत्रिका तपासणीचा प्रश्न मंडळाला सतावत आहे. उत्तरपत्रिकांचे गठ्ठे कस्टडीत येत आहेत तर, दुसरीकडे नियामकांच्या बैठकाही झालेल्या नाहीत.

माध्यमिक व उच्च माध्यमिक शिक्षण मंडळाच्या बारावीच्या परीक्षा २१ फेब्रुवारीपासून सुरू झाल्या आहेत. परीक्षेतील उत्तरपत्रिका तपासणीच्या कामकाजावर राज्यातील अनुदानित कनिष्ठ कॉलेजांमधील शिक्षकांनी बहिष्कार टाकला आहे. मुख्य नियामकांच्यासह विभागीय पातळीवर विषयनिहाय नियामकांच्या बैठका झालेल्या नाहीत. सोमवारी तीन विषयांची परीक्षा होती. तोपर्यंतही या प्रश्नावर तोडगा निघालेला नव्हता. बहिष्कारामुळे मंडळासमोरील चिंता वाढलेली आहे. सोमवारी पेपर सुटल्यानंतर उत्तरपत्रिकांचे गठ्ठे मंडळाने निश्चित केलेल्या कस्टडीत दाखल होत आहेत. पेपर संपल्यानंतर मुख्य नियामक, नियामकांची बैठक होऊन लगेच तपासणीची प्रक्रिया सुरू होते. चार दिवसानंतरही प्रक्रिया सुरू न झाल्याने मंडळाचे तपासणीचे नियोजन बिघडण्याची शक्यता आहे.

शासनाला आंदोलनाची पूर्वीच कल्पना दिली होती. त्यावेळी शासनाने आश्वासन दिले होते. परंतु, ते आश्वासन पाळले नाही. त्यामुळे आम्ही हे आंदोलन सुरू केले आहे. एकही नियामकांची बैठक झालेली नाही.

-प्रा. संभाजी कमानदार, जुक्टा