तिसऱ्या मजल्यावर जिमला गेले, ते परतलेच नाहीत; औरंगाबादमध्ये प्रसिद्ध बिल्डरनं जीवन संपवलं

औरंगाबाद: बांधकाम क्षेत्रातील प्रसिद्ध बिल्डर आणि क्रेडाईचे कोषाध्यक्ष अनिल माधवराव अग्रहारकर (वय ५५ वर्षे, रा. मित्रविहार कॉलनी, उल्कानगरी) यांनी गळफास लावून आत्महत्या केल्याची धक्कादायक घटना आज सकाळी सातच्या सुमारास उघडकीस आली. बांधकाम क्षेत्रातील मोठे प्रस्थ असलेल्या अग्रहारकर यांच्या आत्महत्येने बांधकाम क्षेत्रात एकच खळबळ उडाली आहे.

नातेवाईकांनी दिलेल्या माहितीनुसार अनिल अग्रहारकर आज सकाळी झोपेतून उठले आणि तिसऱ्या मजल्यावर असलेल्या जिममध्ये व्यायाम करण्यासाठी गेले. त्याचवेळी त्यांनी दोरीच्या सहाय्याने आत्महत्या केली. सकाळी सातच्या सुमारास ही घटना उघडकीस आली. कुटुंबियांनी त्यांना तातडीने घाटी रुग्णालयात दाखल केले असता डॉक्टरांनी त्यांना तपासून मयत घोषित केले. अग्रहारकर गेल्या दहा-बारा वर्षांपासून क्रेडाई या प्रसिद्ध बांधकाम व्यावसायिक संघटनेत कार्यरत होते. शहरात त्यांचे अनेक मोठे प्रकल्प सुरू आहेत. गजानन महाराज मंदिर रोडवरील हॉटेल चौरंगीचा तेरा मजली बांधकाम प्रकल्प त्यापैकीच एक आहे.
बाईक काढताना तोल गेला, तरुण खड्ड्यात पडला; पण नशीब बलवत्तर निघालं; पाहा VIDEO
अग्रहारकर यांच्या पश्चात पत्नी, एक मुलगा, एक मुलगी आहे. मुलाचे पाच-सहा महिन्यांपूर्वीच लग्न झाले होते. दोन भाऊ असून दिलीप अग्रहारकर हे शहरात तर किशोर हे मुंबईत राहतात. दरम्यान काहीजणांनी त्यांचा आर्थिक छळ केल्याचा आरोप नातेवाईकांनी केला आहे. या प्रकरणी जवाहरनगर पोलीस ठाण्यात अकस्मात मृत्यूची नोंद करण्यात आली असून पुढील तपास पोलीस करत आहेत.