सहाव्या अवयवदानासाठी औरंगाबादकर डॉक्टर सज्ज

औरंगाबाद : अपघातानंतर ‘ब्रेनडेड’ झालेल्या तरुणाच्या नातेवाईकांनी अवयवदानाचा निर्णय घेतला असून, या तरुणाचे हृदय मुंबईला, तर यकृत पुण्याला पाठविण्याची तयारी सोमवारी रात्री उशिरापर्यंत सुरू होती. त्याचवेळी दोन्ही मूत्रपिंडाचे शहरातील रुग्णांवर प्रत्यारोपण होणार आहे. युनाटेड सिग्मा हॉस्पिटलमध्ये सोमवारी मध्यरात्री तीनच्या सुमारास अवयवदानासाठीची शस्त्रक्रिया सुरू होणार असून, मंगळवारी सकाळी विमानाने हृदय मुंबईला पाठवले जाणार आहेत.
वैजापूर येथील संतोष कारभारी गुंड (३२) यांचा रविवारी (१९ जून) रात्री दुचाकीवरून शहराकडे येत असताना अपघात झाला. यात त्यांच्या डोक्याला गंभीर मार लागल्यामुळे त्यांना शहरातील युनायटेड सिग्मा हॉस्पिटलमध्ये रविवारी रात्री अकराच्या सुमारास दाखल करण्यात आले. दुसऱ्या दिवशी म्हणजेच सोमवारी सकाळी त्यांची प्रकृती खालावली व दुपारी त्यांना हॉस्पिटलने ‘ब्रेनडेड’ जाहीर केले. नातेवाईकांनी अवयवदानाची परवानगी दिल्यानंतर ‘झेडटीसीसी’मार्फत विविध अवयवांची गरज असणाऱ्या रुग्णांचा शोध घेण्यात आला. त्यानंतर तरुणाचे हृदय मुंबईतील फोर्टिस (मुलुंड) हॉस्पिटलमध्ये व पुण्याच्या सह्याद्री हॉस्पिटलमध्ये यकृत पाठविण्याचा निर्णय घेण्यात आला, तर दोन्ही मूत्रपिंडांचे प्रत्यारोपण शहरात होणार असल्याचे सूत्रांनी सांगितले.