बालिकांना न्यायासाठी नेटिझन्सचं ‘कँडल मार्च’

म. टा. प्रतिनिधी, औरंगाबाद

उन्नाव व कठुआ येथे बालिकांवर झालेल्या अत्याचाराच्या विरोधात नेटिझन्स तरुणांनी क्रांतीचौक येथे कँडल मार्च करून आंदोलन केले. अत्याचार करणाऱ्यांवर निर्भया कायदा लागू करण्याची मागणीही यावेळी करण्यात आली.

क्रांतीचौक येथे रविवारी (१५ एप्रिल) सायंकाळी तरूण जमा झाले. हे तरूण फेसबुक, ट्विटर आणि व्हॉट्स अॅप ग्रुपच्या माध्यमातून केलेल्या आवाहनानंतर क्रांतीचौकात आले होते. त्यासाठी जस्टिस फॉर इंडिया या मोहिमेंतर्गत आवाहन करण्यात आले होते. या एका हाकेवर साधारणत: ५०० तरूण कठुआ येथे आठ वर्षांच्या मुलीवर झालेल्या बलात्कार आणि हत्याकांडाच्या विरोधात रस्त्यावर उतरले. या घटनेतील आरोपींना कडक शिक्षा करण्याची मागणी केली. महिलांवर होणारे अत्याचार रोखण्यासाठी निर्भया अॅक्टची कठोर अंमलबजावणी करण्याचीही मागणी त्यांनी केली. यावेळी कॅडल मार्चद्वारे पीडितेला श्रद्धांजली वाहण्यात आली.

या आंदोलनाद्वारे बलात्काराचे सर्व खटले फास्ट ट्रक्ट कोर्टात चालविण्यात यावे. महिला, मुलींवर अत्याचार करणाऱ्यांना फाशीची शिक्षा, सर्व पोलिस ठाण्यात वुमन्स प्रोटेक्शन सेलची स्थापना करून महिला अधिकाऱ्यांची नेमणूक करावी, गुन्हेगारांना पाठीशी घालणाऱ्या संघटनांवर कायमची बंदी घालावी, अशी मागणीही करण्यात आली.

रांगोळीने दिला संदेश

या आंदोलनात एका लाकडी बोर्डावर रंगोळी काढण्यात आली. या रांगोळीत भारत मातेच्या हातात जखमी पीडिता दाखविण्यात आली. या घटनेने भारत मातेच्याही डोळयातून अश्रू वाहताना दाखविण्यात आले. औरंगाबादसह नेटिझन्सने हॅशटॅग जस्टीस फॉर इंडियाच्या माध्यमातून पुणे, उस्मानाबाद, माजलगाव, लातूर येथेही आंदोलने करण्यात आली. बलात्कारीत मुलींना न्याय मिळवून देण्यासाठी सोशल मीडिआवरही आंदोलन सुरू आहे. या आंदोलनांतर्गत अनेक व्हॉट्स ग्रुपने काळ्या रंगाचे डीपी करून निषेध नोंदविला आहे.