कार्गो हब डिसेंबरअखेर सुरू

कार्गो हब डिसेंबरअखेर सुरू
कस्टम आणि इमिग्रेशनचीही सुविधा उपलब्‍ध
म. टा. प्रतिनिधी, औरंगाबाद
चिकलठाणा विमानतळावर आंतरराष्ट्रीय कार्गो तयार करण्याचे काम वेगात सुरू आहे. औरंगाबाद शहरातून आंतरराष्ट्रीय कार्गो डिसेंबरअखेरपासून सुरू होणार असल्याची माहिती विमानतळ प्राधिकरणाच्या सूत्रांनी दिली.
औरंगाबाद शहरातून विविध कंपन्यांचा माल जहाजाद्वारे विदेशात पाठविण्यात येत असतो. विविध कंपन्यांसह कृषी माल कमीतकमी वेळेत आंतरराष्ट्रीय बाजारात पोहोचावा, यासाठी औरंगाबाद विमानतळावर आंतरराष्ट्रीय कार्गो सेवा सुरू करण्याची प्रक्रिया दोन ते अडीच वर्षांपूर्वी सुरू करण्यात आली होती. विमानतळ संचालक डी. जी. साळवे यांच्या काळात ही प्रक्रिया सुरू करण्यात आली. त्यानंतर तत्कालीन संचालक अलोक वार्ष्णेय यांनीही आंतरराष्ट्रीय कार्गो सुरू करण्यासाठी प्रयत्न केले. वार्ष्णेय यांच्याकाळात देशांतर्गत कार्गो सुविधाही ही खासगी कंपनीला देण्यात आली. मात्र त्यानंतर ही प्रक्रिया थंड बस्‍त्यात पडली होती.
डी.जी.साळवे यांनी पुन्हा औरंगाबाद विमानतळाच्या संचालक पदाचा कार्यभार स्वीकारल्यानंतर आंतरराष्ट्रीय कार्गोच्या कामाला पुन्हा प्रारंभ केला आहे. जुन्या विमानतळ परिसरात आंतरराष्ट्रीय कार्गो बांधण्यात येत आहे. आंतरराष्ट्रीय सुरक्षेच्या नियमानुसार या जागेवर सुविधा दिली जाणार आहे. हे काम सध्या प्रगतीपथावर आहे. डिसेंबरअखेरपर्यंत सुरक्षा ‌समितीची मान्यता मिळाल्यास, आंतरराष्ट्रीय कार्गो सुरू करण्यात येणार असल्याची माहिती विमानतळ प्राधिकरणाच्या सूत्रांनी दिली.