म. टा. प्रतिनिधी, औरंगाबाद
एक-एक थर सहा, सात असे थरावर थर रचत दहिहंडी फोडण्याची रंगलेली स्पर्धा अन् सोबतिला 'गोविंदा आला रे आला', 'मच गया शोर सारी नगरी रे', 'हर तरफ है ये शोर' अशा गाण्यांवर नाचताना मिळणारे प्रोत्साहन कॅनॉटमधील वातावरण भारावून करणारे होते.
तरुणाईचा जल्लोष अन् बच्चे कंपनींसह लोकप्रतिनिधी, नागरिकांनी घेतलेला ठेका अशा उत्साहात दहिहंडी रंगत गेली. सायंकाळी चारपासूनच विविध गोविंदा पथक येऊ लागले अन् रंगत वाढत गेली. गोविंदाच्या वेशभुषेतील छोटे मुलं, त्रिशूळ-डमरू घेऊन सहभागी तरुण यामुळे उपस्थितांचाही उत्साह वाढला. कॅनॉट परिसरात स्वाभीमान क्रीडा मंडळ, श्री शिवशंकर सेल्यूअरची दहिहंडी होती. स्वाभीमान क्रीडा मंडळाच्या दहिहंडीचे आयोजन नगरसेवक प्रमोद राठोड, धनंजय अतकरे यांनी केले. विविध गीतांच्या तालावर धुंद होऊन नाचणारी तरुणाई अन् दहिहंडी फोडण्यासाठी एक-एक पथक लावत असलेली हजेरी. सुरुवातीला पाच-सहा थराची मानवंदना देत गोविंदा पथकाने सहभाग घेतला.
रोहिदासपुरा गोविंदा पथक, अविरत गोविंदा पथक, हरसिद्धी माता गोविंदा पथक, शिवछत्रती गोविंदा पथक, श्री संस्थान गोविंदा पथक, जनसेवा गोविंदा अशा दिग्गज गोविंदा पथकासह रंगत आणली ती जयभद्रा, जय भोले, जबरे हनुमान अशा मागील काही वर्षामध्ये येथे विजेतेपदावर आपले नाव कोरलेल्या या संघांनी. पाच, सहा, सात थरांपर्यंतचा थरार अनुभवता आला. 'गोविंदा आला रे आला', 'मच गया शोर सारी नगरी रे', 'हर तरफ है ये शोर', 'मै हू डॉन' अशा गीतांच्या तालावर नाचणारी तरुणाई अन् टाळ्या, शिट्ट्यांनी प्रोत्साहन देणारे नागरिक अशा वातावरणात दहिहंडीचा उत्साह रंगला. 'जय कन्हैयालाल की' घोषणांनी परिसर दणाणला. यावेळी माजी आमदार कल्याण काळे, प्रदीप जैस्वाल, मुकेश राजपूत यांची उपस्थिती होती.