‘जनशताब्दी’, ‘तपोवन’ सुरू करण्याचा प्रस्ताव

औरंगाबाद : राज्यांतर्गत रेल्वे सेवा सुरू करण्यासाठी केंद्र शासनाने परवानगी दिली आहे. त्यानंतर मध्य रेल्वेने राज्यामध्ये काही रेल्वे सुरू करण्याचा प्रस्ताव रेल्वे बोर्डाकडे दिला आहे. त्यात प्रस्तावात जनशताब्दी एक्स्प्रेस आणि तपोवन एक्स्प्रेस सुरू करण्यात येणार असल्याची माहिती समोर आली आहे.

'कोविड'मुळे मार्च महिन्यापासून ते आतापर्यंत रेल्वेची वाहतूक बंद करण्यात आली आहे. 'अनलॉक' प्रक्रिया सुरू झाल्यानंतर राज्यांतर्गत रेल्वेची वाहतूक सुरू करण्याचा निर्णय राज्य शासनाने घेतला आहे. यानिर्णयानंतर मध्य रेल्वेने विविध मार्गावरील रेल्वे सुरू करण्याचा प्रस्ताव दिलेला आहे. या प्रस्तावामध्ये नियमित रेल्वेसह आठवड्यातून दोन किंवा तीन दिवस चालविण्यात येणाऱ्या रेल्वेचाही समावेश करण्यात आला आहे. मध्य रेल्वेने जाहीर केलेल्या विशेष रेल्वेंच्या यादीत पुणे - नांदेड - पुणे ही रेल्वे नियमित धावणार आहे. याशिवाय जालना - औरंगाबाद - दादर जनशताब्दी एक्स्प्रेस, नांदेड - मुंबई तपोवन एक्स्प्रेस या दोन रेल्वेंचाही समावेश करण्यात आला आहे.