मुख्यमंत्र्यांच्या सभेसाठी कडक बंदोबस्त; १७ कॅमेरे, एक हजार पोलिस तैनात

म. टा. प्रतिनिधी, औरंगाबाद ः मुख्यमंत्री उद्धव बाळासाहेब ठाकरे यांची मराठवाडा सांस्कृतिक मंडळाच्या मैदानावर आज, बुधवारी (आठ जून) सभा होणार आहे. या सभेसाठी जवळपास एक हजार पोलिसांचा बंदोबस्त तैनात करण्यात आला आहे. याशिवाय सेफ सिटी कॅमेऱ्यांसह सभेत १७ कॅमेरे लावण्यात येणार आहे. या सभेसाठी पाच पोलिस उपायुक्तांसह अन्य पोलिस अधिकारीही बंदोबस्ताच्या कामाला लावण्यात आल्याची माहिती पोलिस आयुक्त डॉ. निखिल गुप्ता यांनी दिली. विशेष म्हणजे सभेत मंचाच्या मागे कमांड रूमही तयार करण्यात आल्याची माहिती त्यांनी दिली.

औरंगाबाद शहरात राज्याचे मुख्यमंत्री उद्धव बाळासाहेब ठाकरे यांची सभा आयोजित करण्यात आली आहे. या सभेत ८० हजारांपेक्षा अधिक नागरिक येण्याची शक्यता आहे. या सभेसाठी कन्नड, वैजापूर, गंगापूर, पैठण आणि सिल्लोडसह अन्य भागातून मोठ्या प्रमाणात येण्याची शक्यता आहे. यामुळे शहराबाहेरून येणाऱ्या नागरिकांची वाहने उभी करण्यासाठी कर्णपुरा येथील मैदानात पार्किंगची व्यवस्था करण्यात आली आहे. शहरातून येणाऱ्या नागरिकांच्या गाड्या विवेकानंद कॉलेजसह एमपी लॉ कॉलेज येथील पार्किंगमध्ये लावण्यात येणार आहे.

शहरातील विविध मार्गांवरील स्मार्ट सिटी योजनेतंर्गत सीसीटिव्ही कॅमेऱ्यांतून पोलिस कर्मचारी नजर ठेवणार आहे. याशिवाय सभेत १७ कॅमेरे लावण्यात येणार आहे. याशिवाय सभेच्या बंदोबस्तांसाठी सहा पोलिस उपायुक्त, सहा सहायक पोलिस आयुक्त; तसेच २०० पेक्षा अधिक पोलिस निरिक्षक, सहायक निरीक्षक व उपनिरीक्षक यांच्यासह एक हजार पोलिस कर्मचारी आणि २०० होमगार्ड नियुक्त करण्यात आले आहेत. त्याचप्रमाणे राज्य राखीव दलाची एक तुकडीही बंदोबस्तासाठी ठेवण्यात येणार आहे, अशी माहिती पोलिस आयुक्त डॉ. गुप्ता यांनी दिली.

मैदानाच्या बाहेर स्क्रीनची व्यवस्था

मराठवाडा सांस्कृतिक मंडळाच्या मैदान नागरिकांच्या गर्दीने भरणार असल्याचा अंदाज व्यक्त करण्यात येत आहे. यामुळे मैदानाच्या मागील बाजूला मल्टी पर्पज स्कूल परिसरातील मोकळ्या जागेवर मोठी स्क्रीन लावण्यात येणार आहे. याशिवाय खडेकश्वर येथील मैदानात सध्या माहेश्वरी समाजाचा कार्यक्रम सुरू आहे. आयोजकांनी माहेश्वरी समाजाच्या आयोजकांशी चर्चा केली असून, त्यात ठरल्यानुसार खडकेश्वर मैदानात थांबून नागरिकांना ठाकरे यांचे भाषण लाइव्ह ऐकण्याची संधी मिळणार आहे.