शिवरायांच्या पुतळ्याचे उद्घाटन फक्त महाराजांच्या वंशजांच्या हस्तेच करावं; 'या' पक्षाची मागणी

औरंगाबादः छत्रपती शिवाजी महाराज यांचा शहरातील क्रांती चौकात उभारलेल्या पुतळ्या उद्घाटन शिवरायांच्या वंशजांच्या हस्तेच करावे अशी मागणी एमआयएम विद्यार्थी आघाडीकडून करण्यात आली आहे. तर मुख्यमंत्री उद्धव ठाकरे यांनी सुद्धा उपस्थित राहवे अशी भूमिका एमआयएम विद्यार्थी आघाडीकडून घेण्यात आली असल्याने, शिवरायांच्या पुतळ्याच्या उद्घाटनापूर्वीच पुतळ्यावरून वाद समोर आला आहे.

यावेळी एमआयएम विद्यार्थी आघाडीचे प्रदेशाध्यक्ष कुणाल खरात म्हणाले की, औरंगाबाद शहरातील क्रांती चौकात उभारण्यात आलेला छत्रपती शिवाजी महराज यांच्या पुतळ्याचे उद्घाटन फक्त शिवरायांच्या वंशजांच्या हस्तेच करावे. उदयनराजे भोसले, संभाजीराजे भोसले यांच्या हस्ते महाराजांच्या नवीन पुतळ्याचे लोकार्पण करण्यात यावे. तसेच या कार्यक्रमाला मुख्यमंत्री उद्धव ठाकरे यांनी उपस्थित रहावे असं खरात म्हणाले. त्यामुळे आता यावर शिवसेना किंवा महानगरपालिका प्रशासनाची काय भूमिका असणार आहे, हे पाहणं महत्वाचे ठरणार आहे.

वाचाः संप मोडीत काढत गुरुवारी एसटी बस सुरू झाल्या पण, आज घडलं भलतंच

मराठा क्रांती मोर्चाची भूमिका....

यावर बोलताना मराठा आरक्षणाचे याचिकाकर्ते विनोद पाटील म्हणाले की, मागच्या तीन-चार वर्षांपासून शिवप्रेमी महाराजांच्या पुतळ्याची वाट पाहत होते. त्यामुळे बऱ्याच संघर्षानंतर स्मारक शहरात आले आहे. त्यामुळे महाराजांच्या नवीन पुतळ्याचे लोकार्पण १९ फेब्रुवारी म्हणजेच शिवजयंतीच्या दिवशीच व्हावे, अशी मागणी विनोद पाटील यांनी केली आहे.

वाचाः 'व्हाय आय किल्ड गांधी'वर बंदी घाला; खंडपीठात जनहित याचिका दाखल

भाजपची भूमिका....

तर, भाजपकडून सुद्धा १९ फेब्रुवारी म्हणजेच शिवजयंतीच्या दिवशीच महाराजांच्या नवीन पुतळ्याचे लोकार्पण करण्याची मागणी करण्यात आली आहे. तसेच पुतळ्याचे उद्घाटन फक्त शिवरायांच्या वंशजांच्या हस्तेच करावे, अशीही मागणी भाजपचे शहराध्यक्ष संजय केणेकर यांनी केली आहे.

वाचाः कमी शेतीतही लाखोंची कमाई देणारे पिक; हिंगोलीतील तरुणाने साधली प्रगती